სანდრო როსელი, ჟოზეპ მარია ბართომეუ და ნეიმარი სასამართლოს წინაშე წარდგებიან

El PAÍS Deportes-ს ინფორმაციით, "ბარსელონას" ყოფილი პრეზიდენტები - სანდრო როსელი და ჟოზეპ მარია ბართომეუ და ფეხბურთელი - ნეიმარ ჟუნიორი პოტენციური კორუფციის ბრალდებით სასამართლოს წინაშე წარდგებიან.

წყაროს ცნობით, საქმე 2013 წელს განხორციელებულ ტრანსფერს ეხება - არსებობს სამხილი, რომ სანდრო როსელმა ბრაზილიელ ვარსკვლავთან წინასწარი შეთანხმება 2011 წელს, მის "ბარსაში" გადმოსვლამდე 2 წლით ადრე გააფორმა, რაც FIFA-ს წესებს ეწინააღმდეგება. ამის გამო ისინი, შესაძლოა, ციხეში მოხვდნენ.

რაც შეეხება ბართომეუს - ჯერჯერობით, არანაირი მტკიცებულება არ არსებობს, რომ მან ამ შეთანხმებაზე რამე იცოდა, ამიტომ, ამ მომენტისთვის, ჟოზეპს ციხე არ ემუქრება.

ამ საქმეზე გამოძიება ბრაზილიური კომპანიის DIS Esportes-ს სარჩელის შემდეგ დაიწყო, რომელსაც ნეიმარის უფლებების 40% ეკუთვნოდა, მაგრამ თავისი წილი არ მიუღია და მოტყუებული დარჩა, როცა "ბლაუგრანას" პრეზიდენტი როსელი იყო, ვიცეპრეზიდენტი კი - ბართომეუ.

ამასთან, ბრაზილიის პროფესიული სპორტული ასოციაციების ფედერაცია, რომელიც DIS-ს უერთდება, მიიჩნევს, რომ მათ სატრანსფერო უფლებების გარკვეული პროცენტი ეკუთვნოდათ, რომელიც დაირღვა.

პროკურატურა ნეიმარის €10 მილიონით დაჯარიმებასა და 2 წლით თავისუფლების აღკვეთას ითხოვს, როსელისთვის კი - ხუთწლიან პატიმრობას. ამასთან, პროკურატურა ნეიმარის მამის 2 წლით დაკავებას და დედის 1 წლით პატიმრობას ითხოვს, რადგან ტრანსფერში ისინიც მონაწილეობდნენ. ასევე, პროკურატურის დასკვნაში წერია, რომ ნეიმარის ოჯახის კომპანია - N&N - €1.4 მილიონით დააჯარიმონ. გარდა ამისა, მათ "ბარსელონას" €8.4 მილიონით დასჯა სურთ. ბართომეუს კი მხოლოდ DIS ადანაშაულებს და მისთვის 5-წლიან პატიმრობას ითხოვს. 

ამ საქმეს ბარსელონას სასამართლო "ნეიმარ 2-ს" უწოდებს, რადგან "ნეიმარ 1" უკვე დასრულდა და "ბარსამ" €5.5 მილიონი გადაიხადა. აღნიშნული საქმის ფარგლებში ორი პროკურორი გაასამართლეს, როსელსა და ბართომეუს კი პასუხისმგებლობა მოუხსნეს. 

როგორც El País იტყობინება, სასამართლო პროცესი მიმდინარე წლის 17 ოქტომბერს დაიწყება და 7 სესიად გაიმართება. ბრალდებული პატიმრობის საფრთხის წინაშე არიან კორუფციისა და თაღლითობის გამო.