ბარსა ანდონი ირაოლას აკვირდება

Sport იტყობინება, რომ “ბარსელონა” “ბორნმუთის” მწვრთნელ ანდონი ირაოლას აკვირდება.

ირაოლას ლა ლიგაში მუშაობის გამოცდილება აქვს. 41 წლის სპეციალისტი პრემიერ ლიგაში გადაბარგებამდე “რაიოს” წვრთნიდა (სადაც მან “ბარსელონას” “კამპ ნოუზე” დამარცხება მოახერხა). ირაოლა, ჩვეულებრივ, 4-3-3 ან 4-2-3-1 სქემას იყენებს, მიუხედავად მძიმე დასაწყისისა, “ბორნმუთი” ბოლო დროს კარგ ფორმაშია: “ალუბლებმა” პრემიერ ლიგის ბოლო 5 შეხვედრაში 13 ქულა აიღეს.

ანდონი ირაოლას “ბორნმუთთან” კონტრაქტი 2025 წლამდე აკავშირებს. მეორე მხრივ, ჟოან ლაპორტას სურს, ჩავი შეინარჩუნოს და კლუბიდან არ გაუშვას. გარდა ამისა, კლუბის ჩაბარებას ყველაზე ხშირად ჰანსი ფლიკსა და რობერტო დე ძერბის უწინასწარმეტყველებენ, თუ პრეზიდენტი ჩავის დარჩენაზე ვერ დაითანხმებს.