ბარსელონას თავისი ყოფილი ფეხბურთელი შესთავაზეს
მომდევნო სეზონისთვის "ბარსელონას" ერთ-ერთი საზრუნავი მარჯვენა ფლანგის გაძლიერება იქნება, როგორც შეტევაში, ასევე დაცვაში.
ადამა ტრაორე გუნდს ალბათ დატოვებს, გაურკვეველია უსმან დემბელეს მომავალიც, ისევე, როგორც გუნდში დანი ალვესისა და სერჟინიო დესტის დარჩენა. ეს ნიშნავს, რომ "ბარსელონას", შესაძლოა, როგორც მარჯვენა შემტევის, ასევე მარჯვენა მცველის დამატება მოუხდეს.
კატალონიური Sport-ის ინფორმაციით "ბარსას" შესთავაზეს ფეხბურთელი, რომელსაც როგორც მარჯვენა მცველად, ასევე გარემარბად თამაში შეუძლია. საუბარია "ლა მასიას" აღზრდილ სერხი კანოსზე, რომელიც ამჟამად "ბრენტფორდში" თამაშობს.
კანოსი "ლა მასიაში" 2010-2013 წლებში თამაშობდა, რის შემდეგაც "ლივერპულში" გადავიდა. მერსისაიდელთა პირველ გუნდში მისი დებიუტი 2016 წელს, 19 წლის ასაკში შედგა, მაგრამ "წითლების" მაისურით მას მეტჯერ აღარ უთამაშია.
2016 წელს კანოსი "ნორვიჩში" გადავიდა, 2017 წლიდან კი "ბრენტფორდში" გამოდის, რომლის შემადგენლობაშიც უკვე 242 თამაშის ჩატარება მოასწრო. ლონდონელთა მაისურით ის ძირითადად მარჯვენა შემტევად თამაშობდა, მაგრამ ასევე მოგვევლინა მარცხენა შემტევად, ცენტრფორვარდად, მარცხენა ნახევარმცველად, მარჯვენა ნახევარმცველად და მარჯვენა მცველად.
სერხი კანოსის შეძენას რამდენიმე პლუსი აქვს. ის ჯერ მხოლოდ 25 წლისაა, უნივერსალია, "ბარსელონასთვის" პრობლემურ პოზიციებზე თამაში შეუძლია, კლუბთან შეგუება არ გაუჭირდება, მისი ტრანსფერი დაახლოებით 10 მილიონი ევრო დაჯდება და არც ხელფასი იქნება პრობლემა. ერთადერთი, რაზეც "ბარსას" სამწვრთნელო შტაბი ფიქრობს, არის ის, თუ რამდენად შეესაბამება კანოსის დონე "ბარსელონას" მიზნებს.
ამ სიახლეზე კომენტარები გათიშულია.
კომენტარები [ 12 ]