ერთი წელი საპრეზიდენტო არჩევნებიდან: ბარსელონაში იმედს ვხედავ!
ჟოან ლაპორტას "ბარსელონას" პრეზიდენტის პოსტზე დაბრუნებიდან დღეს ზუსტად ერთი წელი გავიდა.
2021 წლის 7 მარტს ლაპორტამ საპრეზიდენტო არჩევნები მოიგო და გაუდგა გზა, რომელიც, როგორც თავად ამბობს, მოსალოდნელზე რთული გამოდგა.
განვლილ ერთ წელს ლაპორტა Sport-ისთვის მიცემულ მცირე ინტერვიუში აფასებს.
- იყო ეს წელი ისეთი, როგორსაც ელოდით?
- ნაწილობრივ კი და ნაწილობრივ არა. კიდევ უფრო რთული გამოდგა, ვიდრე ველოდი. ამის მიზეზი სახელფასო ჭერია. ამან საქმე ძალიან გაგვირთულა. სწორედ ამიტომ ვაფასებ იმას, რაც ამ მიმართულებით გაკეთდა.
- რომელი იყო საუკეთესო და ყველაზე ცუდი მომენტი ამ ერთი წლის განმავლობაში?
- ყველაზე ცუდი მესის წასვლა იყო. საუკეთესო კი იმის ხილვაა, თუ როგორ აუმჯობესებს ჩავი და მისი ხალხი ჩვენს გუნდს. ასევე ის ერთიანობა, რომელიც დირექტორთა საბჭოში სუფევს. ამ გაბედული ხალხის მიზანია, "ბარსელონას" გულშემატკივრებს სიხარული დაუბრუნონ. ამ მიზნისკენ მიმავალ გზას ვადგავართ.
- ნანობთ რომელიმე გადაწყვეტილებას, რომელიც გასული ერთი წლის განმავლობაში მიიღეთ?
- არცერთ გადაწყვეტილებას არ ვნანობ. ზოგიერთი მათგანი რთული მისაღები იყო, მაგრამ მათ არ ვნანობ. კლუბი ყველაფერზე მაღლა უნდა დააყენო, ყველაზე და ყველაფერზე მაღლა.
- წინასაარჩევნო კამპანიის დროს თქვით, რომ გინდოდათ, კატალონიელების ოცნებები გაგეცოცხლებინათ. შეძელით ეს?
- ვთქვი, რომ "ბარსელონაში" სიხარული დაბრუნდებოდა და ამ გზას ვადგავართ. ახლა გაცილებით მეტ იმედსა და სიხარულს ვხედავ. ველით, რომ ეს იმედი სიხარულში გადაიზრდება, რადგან ამისთვის ყოველდღიურად ვმუშაობთ. ყოველ საათსა და ყოველ წუთს იმისთვის მუშაობაში ვატარებთ, რომ ტიტულები მოვიგოთ და "ბარსელონაში" სიხარული დავაბრუნოთ.
ამ სიახლეზე კომენტარები გათიშულია.
კომენტარები [ 10 ]