ბარსელონა უმტიტის იჯარით გაშვებაზე მუშაობს
"ბარსელონას" ცენტრალური მცველი სამუელ უმტიტი, დიდი ალბათობით, ამ ზაფხულში კატალონიურ კლუბს დატოვებს.
Mundo Deportivo-ს ინფორმაციით, "ბარსა" უმტიტის განათხოვრებაზე უკვე მუშაობს. კატალონიელები მოლაპარაკებებს "მარსელთან" აწარმოებენ, რაც იმას ნიშნავს, რომ დიდი შანსია, 27 წლის მცველი, რომელიც არც "ბლაუგრანას" და არც რონალდ კუმანის გეგმებში არ შედის, საფრანგეთში დაბრუნდეს.
MD-ს ცნობით, "ბარსელონასა" და "მარსელის" სპორტულ დირექტორებს, შესაბამისად, მატეუ ალემანისა და პაბლო ლონგორიას კარგი ურთიერთობა აქვთ. სწორედ ესაა უმტიტის ფრანგულ კლუბში შესაძლო გასხვისების ერთ-ერთი მთავარი მიზეზი.
იმავე წყაროს ინფორმაციით, "ლურჯ-ბროწეულისფერებს" უმტიტის გაყიდვა სურთ, მაგრამ ფეხბურთელს არც კლუბის დატოვება და არც ხელფასის შემცირება უნდა. აქედან გამომდინარე, "ბარსას" სამუელის განათხოვრების ვარიანტიღა დარჩა, რაზეც კლუბი მუშაობს კიდეც.
Catalunya Radio იტყობინება, რომ უმტიტი იჯარით წასვლაზე თანახმაა.
სამუელ უმტიტი "ბარსელონას" 2016 წელს შეუერთდა. მან პირველი სეზონი შესანიშნავად ჩაატარა და გულშემატკივრების გულების მოგებაც შეძლო, თუმცა, ბოლო წლებია ფეხბურთელი ტრავმების გამო სათანადო დონეზე ვეღარ ასპარეზობს.
ამ სიახლეზე კომენტარები გათიშულია.
კომენტარები [ 7 ]