პეპის სტატისტიკა კამპ ნოუზე

24 აგვისტოს “კამპ ნოუ” კარგი საფეხბურთო სანახაობის მოლოდინში იქნება. კატალონიას პეპ გვარდიოლას “მანჩესტერ სიტი” ეწვევა.

“ბარსელონას” გულშემატკივრებს გვარდიოლას წარდგენა არ სჭირდებათ, ის ხომ კლუბის ლეგენდარული კაპიტანი და კიდევ უფრო ლეგენდარული მწვრთნელია.

“ბლაუგრანამ” გვარდიოლას მწვრთნელობის დროს მის მიერ “კამპ ნოუზე” ჩატარებული თამაშების სტატისტიკა შეგვახსენა. სტუმრის რანგში პეპს საშინელი შედეგები აქვს. 2012 წელს გუნდის დატოვების შემდეგ გვარდიოლა “კამპ ნოუზე” პირველად 2015 წელს დაბრუნდა, როდესაც ჩემპიონთა ლიგის 1/2 ფინალში მისი “ბაიერნი” 0-3 განადგურდა. ერთი წლის შემდეგ ჩემპიონთა ლიგის უკვე ჯგუფურ ეტაპზე პეპი “ბარსას” “მანჩესტერ სიტითი” ეწვია და ამჯერად 0-4 განადგურდა. ამ 7 გოლიდან 5 ლიონელ მესის ანგარიშზეა.

რაც შეეხება “კამპ ნოუზე” მასპინძლის სტატუსით ჩატარებულ შეხვედრებს, აქ, რა თქმა უნდა, საქმე საპირისპიროდ გვაქვს. პეპს მოგების შესანიშნავი მაჩვენებელი აქვს – 82%. 118 თამაშიდან “ბარსელონამ” 97 მოიგო, 14 ფრედ დაასრულა და მხოლოდ 7 დათმო.

“ბარსელონას” მთავარი მწვრთნელის როლში პეპი “კამპ ნოუზე” ბოლოს 2012 წლის 5 მაისს ვიხილეთ, როდესაც მისმა გუნდმა დერბიში “ესპანიოლი” 4-0 გაანადგურა.