24 წელი ჩავი ერნანდესის დებიუტიდან

დღეს, ჩავი ერნანდესის “ბარსელონას” პირველ გუნდში დებიუტიდან ზუსტად 24 წელი გავიდა – 1998 წლის 24 მარტს, კატალონიის თასის ნახევარფინალში, “ლეიდასთან” 2-1 მოგებულ მატჩში “ბარსას” ამჟამინდელმა მწვრთნელმა ლურჯ-ბროწეულისფერი მაისური 18 წლისა და 2 თვის ასაკში, პირველად მოირგო.

ასევე, ეს მატჩი საინტერესო რამდენიმე ფაქტის გამო იყო – “ლეიდას” მხრიდან გოლი ტიტო ვილანოვამ გაიტანა, რომელიც, მოგვიანებით, “ბარსა ბ-ს” ფეხბურთელი, პეპ გვარდიოლას ასისტენტი და შემდეგ, “ბარსელონას” მწვრთნელი გახდა. ყველაზე საინტერესო კი ისაა, რომ ამ დღეს “ბლაუგრანას” ჟოზე მოურინიო ხელმძღვანელობდა – პორტუგალიელმა აღნიშნული შეთავაზება ლუი ვან გაალისგან (გუნდის იმჟამინდელი თავკაცი) მიიღო.

“ლეიდას” კარში 2 გოლი ჟოფრე მატეუმ გაიტანა.

#OTD in 1998, Xavi made his official debut for Barça#MadeInLaMasia pic.twitter.com/X0jKMiltnI

— FC Barcelona (@FCBarcelona) March 24, 2022

ბარსას ლეგენდა

ლუი ვან გაალი 18 წლის ჩავის თამაშით მოიხიბლა, 1998 წლის აგვისტოს კი მან, “მალიორკასთან” გასვლით შეხვედრაში, “ბარსას” შემადგენლობაში ოფიციალურ მატჩში პირველად ითამაშა. კატალონიელებმა ხსენებული დაპირისპირება 1-2 წააგეს, მაგრამ, დებიუტანტმა თავი გოლით გამოიჩინა და კარიერა შთამბეჭდავად დაიწყო.

“ბარსელონაში” ჩავის ანგარიშზე 17 ჩატარებული სეზონი და 767 ოფიციალური მატჩია. “მაესტრო” “ბარსას” ლეგენდარული თაობის ერთი-ერთი უდიდესი წარმომადგენელია. მან “ბლაუგრანაში” ყველა შესაძლო ტიტული, მათ შორის, 8 ლა ლიგა, 4 ჩემპიონთა ლიგა და 2008-09 და 2014-15 წლების სეზონში დაუვიწყარი ტრებლი მოიგო.

დაბრუნება მწვრთნელის რანგში

2015 წელს “ბარსადან” წასვლის შემდეგ, ჩავი კატალონიურ გრანდში 2021 წლის 20 ნოემბერს, ამჯერად, მწვრთნელის რანგში დაბრუნდა. სადებიუტო მატჩში “ესპანიოლის” 1-0 დამარცხების შემდეგ, გუნდმა დიდი პროგრესი განიცადა, რაც “სანტიაგო ბერნაბეუზე” “რეალის” 4-0 განადგურებით დაგვირგვინდა.

“ბარსელონა” 12 მატჩია, დაუმარცხებელია. ამ დროის განმავლობაში ჩავის შეგირდებმა ისეთი მატჩები შემოგვთავაზეს, როგორებიც, მაგალითად, “ვალენსიასთან” 4-1 მოგება, “ნაპოლისთან” 4-2 გამარჯვება და “ბილბაოს” კარში გატანილი 4 უპასუხო გოლია.