ჟოზე მოურინიო: ბარსელონასთან დაპირისპირება ომია

ჟოზე მოურინიომ თავისი კარიერის ერთ-ერთი ყველაზე სკანდალური თავი ხელახლა გადაშალა. პორტუგალიელი მწვრთნელის შესახებ გადაღებული ახალი დოკუმენტური ფილმი, რომელიც სამშაბათს Netflix-ზე გამოვიდა, იხსენებს არაერთ მოვლენას “რეალ მადრიდში” მისი პირველი მუშაობის პერიოდიდან და მათ შორის, რა თქმა უნდა, “ბარსელონასთან” დაპირისპირებებს.

რეალ მადრიდი და ბარსელონა: ეს ომია!

დოკუმენტურმა ფილმმა ასევე გაიხსენა ცნობილი დაპირისპირება მოურინიოსა და კასილიასს შორის. ის მას შემდეგ დაიწყო, რაც “რეალ მადრიდის” მეკარემ “ბარსელონას” კაპიტან ჩავი ერნანდესს დაურეკა ორ ბანაკს შორის დაძაბულობის განმუხტვის მიზნით, რადგან “ელ კლასიკოს” მტრობამ ესპანეთის ეროვნულ ნაკრებშიც გადაინაცვლა.

კასილიასი შუაში აღმოჩნდა. ის ერთდროულად “რეალ მადრიდისა” და ესპანეთის ნაკრების კაპიტანი იყო და ამ კონფლიქტმა იგი ძალიან უხერხულ მდგომარეობაში ჩააგდო. “შენ გიწევდა დაპირისპირება შენს თანაგუნდელებთან, რომლებიც შენი მტრები იყვნენ საფეხბურთო მოედანზე, შემდეგ კი ისინი შენი თანაგუნდელები ხდებიან ეროვნულ ნაკრებში. არ მომწონდა ამის ყურება და ეს მწვრთნელსაც ვუთხარი,” – თქვა მან.

მოურინიო ამას სრულიად განსხვავებულად ხედავდა. მისთვის კონკურენციის უმაღლეს დონეზე შენარჩუნება განხილვას არ ექვემდებარებოდა მანამ, სანამ ორივე კლუბი ერთი და იგივე ტიტულებისთვის იბრძოდა.

“მე მათ ვუთხარი: ეს არის “ბარსელონასა” და “რეალ მადრიდის” დაპირისპირება. როდესაც ეროვნულ ნაკრებში წახვალთ, შეგიძლიათ ერთმანეთს აკოცოთ, მაგრამ არა ახლა. ეს ომია. არის რაღაცები, რასაც არ ვიღებ და არასდროს მივიღებ. და როდესაც ვინმე პატივს არ მცემს, ეს პრობლემად იქცევა,” – განაცხადა მან.

ჟოზე მოურინიოს “ბარსელონას” წინააღმდეგ გუნდი სათამაშოდ 27-ჯერ გაუყვანია. პორტუგალიელი სპეციალისტის ანგარიშზე 8 მოგება, 9 ფრე და 10 მარცხია.