არგენტინას ფინალში გოლი უკვე 16 წელია არ გაუტანია

11 ივლისს გამთენიისას კოპა ამერიკას სუპერ ფინალია – არგენტინა მასპინძელი ბრაზილიის წინააღმდეგ.

არგენტინა წარუმატებელი სერიის დასრულებასთან, ხოლო ლეო მესი პირველი დიდი სანაკრებო ტიტულის მოგებასთან კიდევ ერთხელაა ახლოს, მაგრამ მიმდინარე საუკუნეში ფინალებში ნაჩვენები შედეგები “ალბისელესტეს” ოპტიმიზმის საფუძველს ნამდვილად არ აძლევს.

მესის არგენტინის ნაკრების მაისურით ფინალში გოლი ჯერ არ აქვს გატანილი, იმის მიუხედავად, რომ გადამწყვეტ დაპირისპირებაში მან მონაწილეობა 4-ჯერ მიიღო. თუმცა კიდევ უფრო სავალალო სტატისტიკა ისაა, რომ ამ შეხვედრებში არათუ მესის, არამედ არცერთ სხვა არგენტინელს გოლი არ გაუტანია.

არგენტინამ ფინალში გოლი ბოლოს 2005 წლის 29 ივნისს, კონფედერაციის თასზე გაიტანა, როდესაც ბრაზილიასთან 1-4 განადგურდა. იმ გოლის ავტორი მესის კუმირი და არგენტინის სამწვრთნელო შტაბის ამჟამინდელი წევრი პაბლო აიმარი იყო.

იმავე წლის აგვისტოში არგენტინის მთავარ ნაკრებში მესის დებიუტი შედგა. მიუხედავად იმისა, რომ ლეო “ალბისელეტეს” ისტორიაში საუკეთესო ბომბარდირია, მისი ნაკრებში გამოჩენა ფეხბედნიერი ნამდვილად არ ყოფილა, რადგან მას შემდეგ გუნდმა 4 ფინალი ითამაშა და გოლი ვერცერთში გაიტანა.

2005 წლის შემდეგ არგენტინის მიერ ფინალებში ნაჩვენები შედეგები:

• 2007 წელი, კოპა ამერიკა, ბრაზილია-არგენტინა 3-0
• 2014 წელი, მსოფლიო ჩემპიონატი, არგენტინა-გერმანია 0-1
• 2015 წელი, კოპა ამერიკა, ჩილე-არგენტინა 0-0
• 2016 წელი, კოპა ამერიკა, არგენტინა-ჩილე 0-0