“ბარსელონამ” წარმოადგინა კულტურული და სახელოვნებო პროექტი “BARÇA PLAYS DIFFERENT”, რომელმაც კლუბის ტრადიციული იდენტობა Tyler, The Creator-ის შემოქმედებით სამყაროსთან და ბარსელონის ადგილობრივ ტალანტებთან დააკავშირა. ინიციატივის მიზანი ფეხბურთის მუსიკასთან, ხელოვნებასთან, მოდასთან და თანამედროვე ურბანულ კულტურასთან შერწყმის ახალი გზების ძიებაა.
ღონისძიება ქალაქის ცენტრში მდებარე კულტურულ სივრცე Pla Roig-ში გაიმართა. ეს პროექტი “ბარსელონასა” და Spotify-ს შორის არსებული პარტნიორობის ნაწილია, რომელიც უშუალოდ 25 ოქტომბერს გასამართ ელ კლასიკოს უკავშირდება – “რეალ მადრიდის” წინააღმდეგ პირველი გუნდი მოედანზე სწორედ ამერიკელი შემსრულებლის მიერ დაარსებული ბრენდის, GOLF WANG-ის ლოგოიანი მაისურებით გავა.
განსხვავებული ენა, ერთი გულისცემა
“BARÇA PLAYS DIFFERENT” ჩაფიქრებული იყო, როგორც ინტიმური და შთამაგონებელი გამოცდილება, რომელმაც სხვადასხვა შემოქმედებით სფეროს შორის დიალოგი შექმნა. საღამოს მთავარი ელემენტები მუსიკა, საფეხბურთო ჟონგლიორობა, თანამედროვე ცეკვა და ილუსტრაცია გახლდათ.
ადგილობრივი არტისტების ჩართულობით, ღონისძიებამ გამოკვეთა იდეა, რომელიც საერთოა როგორც “ბარსელონასთვის”, ისე Tyler, The Creator-ისთვის: შემოქმედებითი თავისუფლების, მკაფიო თვითმყოფადობისა და განსხვავებული მიდგომების მეშვეობით ინდივიდუალური თვითგამოხატვა კოლექტიურ ემოციად აქციო.
პროექტში მონაწილეობა მიიღეს მუსიკის, მოდის, დიზაინისა და თანამედროვე ხელოვნების სფეროს წარმომადგენლებმა. ეს არჩევანი კლუბის იმ სურვილს უსვამს ხაზს, რომ დაუკავშირდეს ახალ კულტურულ წრეებს და “ბარსელონას” სამყარო იმ ადამიანებთანაც მიიტანოს, ვისთვისაც სპორტი კლუბთან დაკავშირების ერთადერთი საშუალება არ არის.
ბრენდის სტრატეგია ახალ თაობებთან დასაახლოებლად
ეს ინიციატივა “ბარსელონას” გლობალური ბრენდის სტრატეგიის ნაწილია, რომლის მიზანი სპორტის ფარგლებს გარეთ გასვლა და ახალგაზრდა თაობასთან მათი ინტერესებისა და თვითგამოხატვის ენით კომუნიკაციაა.
ეს ხედვა ეფუძნება პრინციპს, რომ “ბარსელონა” მხოლოდ საფეხბურთო კლუბი კი არა, უნიკალური ღირებულებებისა და კულტურული მემკვიდრეობის მქონე გლობალური ბრენდია, რომელსაც ემოციური კავშირის დამყარება მთელი მსოფლიოს მასშტაბით შეუძლია. სხვადასხვა შემოქმედებითი ინდუსტრიის წარმომადგენელთა ჩართულობა ხიდს აგებს მრავალფეროვან საზოგადოებებთან და კატალონიურ კლუბს თანამედროვე კულტურული დისკუსიების ცენტრში აქცევს.
ბარსელონა: იდენტობისა და კრეატიულობის ეპიცენტრი
ამ ინიციატივაში ქალაქ ბარსელონას ცენტრალური ადგილი უკავია – არა მხოლოდ როგორც ლოკაციას, არამედ როგორც კლუბის იდენტობის განუყოფელ ნაწილს და ნიჭის, კრეატიულობისა და მრავალფეროვნების სიმბოლოს.
ადგილობრივი შემოქმედების წინა პლანზე წამოწევით, პროექტმა მკაფიოდ აჩვენა კავშირი კლუბსა და ქალაქს შორის: “ბარსელონა” ქმნის იდენტობას, რომელსაც საერთო ემოციების გაღვივება შეუძლია; Tyler, The Creator შემოაქვს ორიგინალურობითა და შემოქმედებითი თავისუფლებით გამორჩეული საკუთარი სამყარო; ხოლო თავად ქალაქი ბარსელონა უზრუნველყოფს იმ შემოქმედებით გარემოსა და კულტურულ ენერგიას, რაც ამ ორი განსხვავებული სამყაროს გადაკვეთას შესაძლებელს ხდის.
უნდა მოვიგოთ ხვალ უეჭველი რაცარუნდა მოხდეს ცუდი ისაა რო კუნდე გარსია რომ არ იქნება მარტინს მტერი ენდო,იმედი მაქვს ფლიკი სწორ შემადგენლობას შეარჩევს და ცუციკა გორდონს არ დააყენებს