დღე, როცა მატეუ ლაოსმა მადრიდის ატლეტიკო გააჩემპიონა

დღეს ცნობილი გახდა, რომ 8 მაისს, კატალონიის “ბარსელონასა” და მადრიდის “ატლეტიკოს” შორის გასამართი უმნიშვნელოვანესი შეხვედრის მთავარ არბიტრად მატეუ ლაოსი დაინიშნა.

ახლა კი, Mundo Deportivo სწორედ ზემოხსენებული მსაჯის მიერ დაშვებულ შეცდომას გვახსენებს, რომელმაც 2013/14 წლების სეზონის ლა ლიგის გამარჯვებულის ბედი გადაწყვიტა.

2014 წლის 17 მაისს, პრიმერა დივიზიონის 38-ე ტურში, “კამპ ნოუზე” “ბარსა” პირველადგილოსან “როხიბლანკოს” დაუპირისპირდა, რომელსაც 3 ქულით ჩამორჩებოდა – შესაბამისად, ამ მატჩის მოგებით კატალონიელებს ჩემპიონობა შეეძლოთ (ურთიერთშეხვედრებში უკეთესი შედეგის მიღების შემთხვევაში – პირველი წრის მატჩი მადრიდში 0-0 დასრულდა), დიეგო სიმეონეს გუნდს კი ფრეც აწყობდა.

ტაბლოზე ანგარიში 33-ე წუთზე ალექსის სანჩესმა “ბარსელონას” სასარგებლოდ ააციმციმა, მადრიდელთა მხრიდან კი წონასწორობა 49 წუთზე დიეგო გოდინმა აღადგინა და საბოლოო შედეგიც დააფიქსირა.

თუმცა, 64 წუთზე ანტონიო მატეუ ლაოსმა ლიონელ მესის გოლი “თამაშგარის” გამო უსამართლოდ გააუქმა – აღნიშნულ მომენტში არგენტინელს ბურთი მეტოქისგან, ხუანფრანისგან მოუვიდა, რის შემდეგაც ტიბო კურტუას აჯობა და “ბლაუგრანა” დააწინაურა, მაგრამ…

სასურველი ანგარიშის წყალობით, “ჩოლოს” შეგირდებმა ესპანეთის ჩემპიონატი 90 ქულით მოიგეს, “ბარსელონა” კი 87 ქულით მეორე ადგილზე გავიდა.

მოგვიანებით, “ლურჯ-ბროწეულისფერთა” იმჟამინდელი მწვრთნელის, ტატა მარტინოს ასისტენტი, ელვიო პაოლოროზო ამტკიცებდა, რომ შეხვედრის დასრულების შემდეგ ლაოსი კლუბის გასახდელ ოთახში შემოვიდა და მომხდარის გამო ბოდიში მოიხადა.

მაგრამ, 2019 წელს, Radio Marca-სთან საუბარში, მატეუმ შემდეგი რამ განაცხადა:

7 წლის შემდეგ ეს გუნდები ერთმანეთს განსხვავებულ სიტუაციაში ხვდებიან – 34 ტურის შემდეგ რონალდ კუმანის ბიჭებს 74 ქულა აქვთ და ლიდერ “ატლეტიკოს” 2 ქულით ჩამორჩებიან.