კარლეს პერესი: "ბარსელონასგან" ასეთი მოქცევა არ დამიმსახურებია

"ბარსელონას" სკოლის აღზრდილი ახალგაზრდა ფეხბურთელი, კარლეს პერესი, რომელიც "რომაში" თამაშობს, კატალონიური გუნდის დატოვებას იხსენებს.

"გამიკვირდა, როდესაც გავიგე, რომ "ბარსელონა" გუნდიდან მიშვებდა. ეს არ დამიმსახურებია. თუმცა, ეს თვეების წინ მოხდა. ახლა "რომაში" ვარ, იტალიის ერთ-ერთ საუკეთესო კლუბში.

მაშინაც კი, როდესაც "ბარსა ბ-ში" ვიყავი, ლა ლიგის გუნდებისგან შემოთავაზებები მქონდა, მაგრამ ყოველთვის უარს ვამბობდი, რადგან ჩემი მიზანი "ბარსელონას" პირველ გუნდში მოხვედრა იყო.

საბოლოოდ, შანსი მივიღე და ვფიქრობ, ის მაქსიმალურად გამოვიყენე. პირველი გუნდის კონტრაქტის გაფორმებაც კი შემომთავაზეს." - ციტირებს 22 წლის თავდამსხმელის სიტყვებს EFE.

კარლეს პერესმა მიმდინარე სეზონი "ბარსელონაში" დაიწყო და 12 თამაშში 2 გოლი გაიტანა, 30 იანვარს კი, "რომას" იჯარით შეუერთდა. რომაელებმა, რომელთა რიგებშიც ესპანელმა 14 მატჩში თავი 2-ჯერ გამოიჩინა, პერესი 11 მილიონ ევროდ გამოისყიდეს.