ლუის სუარესი “ბარსელონას” მე-3 საუკეთესო გოლეადორის ამპლუაში დატოვებს | MD

მოგეხსენებათ, ლუის სუარესი, დიდი ალბათობით, “ბარსელონას” მიმდინარე ზაფხულის სატრანსფერო ფანჯარაზე დატოვებს, ვინაიდან, იგი რონალდ კუმანის გეგმებში არ შედის.

როგორც ჩანს, “ელ პისტოლეროსთვის” მიუნხენის “ბაიერნთან” ჩატარებული მტკივნეული მატჩი ბოლო იყო, სადაც ურუგვაელმა შესანიშნავი ქმედებისა და დარტყის შემდეგ მანუელ ნოიერს გაუტანა და პრესტიჟის ბურთი შეაგდო.

Mundo Deportivo-ს ინფორმაციით, 33 წლის თავდამსხმელი “ბარსას” ისტორიაში მესამე საუკეთესო ბომბარდირია – მის წინ მხოლოდ ლიონელ მესი და სესარ როდრიგესი იმყოფებიან.

ლუისმა კატალონიელთა რიგებში 283 მატჩში 198 გოლი მიითვალა. მსოფლიოს ერთ-ერთი საუკეთესო შემტევი “ბლაუგრანამ” 2014 წელს, “ლივერპულიდან” 81 მილიონი ევროს სანაცვლოდ გაიფორმა. მსოფლიო ჩემპიონატზე ჯორჯო კიელინისთან მომხდარი ინციდენტის გამო, სუარესმა 4-თვიანი დისკვალიფიკაცია მიიღო, რის გამოც მისი დებიუტი 25 ოქტომბრამდე გადაიდო (აღნიშნულ დღეს მან “ელ კლასიკოში” ლურჯ-ბროეულისფერი მაისური პირველად მოირგო).

ერთი თვის შემდეგ, 25 ნოემბერს, ურუგვაელმა პირველი გოლიც გაიტანა – მისი მსხვერპლი კვიპროსული “აპოელი” აღმოჩნდა (4-0).

პრიმერა დივიზიონის ეგიდით კი ლუისმა სადებიუტო ბურთი “კორდობას” კარში შეაგდო (5-0).

მიმდინარე სეზონში “ელ პისტოლერომ” 36 დაპირსპირებაში (28 – ლა ლიგაში, 7- ჩემპიონთა ლიგაზე, 1 – ესპანეთის სუპერ თასზე) თავი 18 გოლით გამოიჩინა (16 – პრიმერაში).

თანაც, ეს იმის ფონზე, რომ სუარესს მუხლზე ჩატარებული ოპერაციის გამო საკმაო დრო გაუცდა. მიუხედავად ამისა, 16 გოლით, ლა ლიგის ბომბარდირთა დავაში მან მესამე ადგილი დაიკავა. გთავაზობთ სუარესის სტატისტიკას სეზონების მიხედვით (“ბარსელონაში”):

• 2014-2015 – 43 მატჩი, 25 გოლი, 23 ასისტი;
• 2015-2016 – 53 მატჩი, 59 გოლი, 24 ასისტი;
• 2016-2017 – 51 მატჩი, 37 გოლი, 18 ასისტი;
• 2017-2018 – 51 მატჩი, 31 გოლი, 19 ასისტი;
• 2018-2019 – 49 მატჩი, 25 გოლი, 13 ასისტი;
• 2019-2020 – 36 მატჩი, 21 გოლი, 12 ასისტი;

ჯამში – 283 მატჩი, 198 გოლი, 109 ასისტი.