ვალიადოლიდი-ბარსელონა – მატჩისწინა მიმოხილვა

ლა ლიგის 2019/20 წლების გათამაშების დასრულებამდე 3 ტურიღაა დარჩენილი და “ბარსელონა” ესპანეთის ჩემპიონობისთვის, ფორმალურად, ჯერ კიდევ იბრძვის.

იმისათვის, რომ “ბლაუგრანამ” ჩემპიონის სტატუსის შენარჩუნების ისედაც მიზერული შანსები შეინარჩუნოს, კიკე სეტიენის გუნდმა, 36-ე ტურში, “ვალიადოლიდი” სტუმრად აუცილებლად უნდა დაამარცხოს. იმის გათვალისწინებით, რომ მეტოქე უმოტივაციოდაა დარჩენილი, “ბარსას” 3 ქულის აღება, თითქოს, არ უნდა გაუჭირდეს, მაგრამ არც ის უნდა დავივიწყოთ, ძალიან იშვიათი გამონაკლისების გარდა, როგორ უჭირს სეტიენის გუნდს მოგება.

სათამაშო ფორმა

“ვალიადოლიდს”, ბოლო 5 საშინაო თამაშიდან მხოლოდ 1 აქვს მოგებული, მაგრამ მხოლოდ ამდენივე წაგებული.

“ბარსელონას” 9-მატჩიანი წაუგებელი სერია აქვს, მაგრამ სეზონის განახლების შემდეგ, კატალონიელებმა ქულები 3 მატჩში დაკარგეს, ბოლო 3 გასვლითი შეხვედრიდან კი მხოლოდ 1 მოიგეს.

დანაკლისი

“ბარსელონას”, ტრადიციულად ლაზარეთში მყოფი დემბელესა და უმტიტის გარდა, ასევე ტრავმირებული დე იონგი და არტური არ ეყოლება. სამგიეროდ, გუნდს დაუბრუნდა ჟუნიორ ფირპო.

“ბარსელონას” განაცხადი.

მასპინძლებს სალისუ, მიჩელი, ბენ არფა და პედრო პორო არ ეყოლებათ. განსაკუთრებით პირველი 2 მათგანის არყოფნაა აღსანიშნავი – მასპინძელთა დამრიგებელი სერხიო გონსალესი, დაცვაში ყველაზე მეტად სალისუს, ხოლო ნახევარდაცვაში მიჩელს ენდობა.

ურთიერთშეხვედრები

გუნდები ერთმანეთს 94-ედ შეხვდებიან. წინა 93 დაპირისპირებიდან “ბარსამ” 61 მოიგო, 16 ფრედ ითამაშა, ხოლო ამდენივე წააგო, გაიტანა 217 და გაუშვა 81 გოლი, მიიღო 100 ყვითელი და 7 წითელი ბარათი.

აღსანიშნავია, რომ “ვალიადოლიდთან” გამართულ ბოლო 12 თამაშში “ბარსელონამ” 11 მოიგო და 1 წააგო.

არბიტრი

შეხვედრის მთავარი მსაჯი საყოველთაოდ ცნობილი ანტონიო მატეუ ლაოსია.

ლაოსის მსაჯობით ჩატარებული 38 თამაშიდან “ბარსამ” 26 მოიგო (68%), 8 ფრედ დაასრულა (21%) და 4 წააგო (11%), მიიღო 85 ყვითელი (თამაშში საშუალოდ 2.2) და 6 წითელი ბარათი.

“ვალიადოლიდის” მონაგარი ასეთია: 22 თამაში, 10 მოგება (45%), 7 ფრე (32%) და 5 წაგება (23%), მიღებული 57 ყვითელი (თამაშში საშუალოდ 2.6) და 4 წითელი ბარათი.

რაც შეეხება ლაოსის ზოგად სტატისტიკას – ლა ლიგაში, ის, საშუალოდ, 5 ყვითელ და 0.25 წითელ ბარათს აჩვენებს. კონკრეტულად მიმდინარე სეზონში მისი სტატისტიკა ასეთია – საშუალოდ 5.5 ყვითელი და 0.27 წითელი ბარათი.

სტატისტიკა

• “ვალიადოლიდის” ბოლო 20 საშინაო თამაშიდან 16-ში 2.5 გოლზე ნაკლები გადიოდა;
• ამ გუნდების ბოლო 12 დაპირისპირებიდან 11 “ბარსელონამ” მოიგო;
• “ბარსელონას”, ლა ლიგაში, 9-მატჩიანი წაუგებელი სერია აქვს.

მწვრთნელების კომენტარები

კიკე სეტიენი: “გუნდი კარგადაა. არსებული დაკვირვებით, გუნდი გადაღლილი არ არის, თუმცა “ესპანიოლთან” მეორე ტაიმში შეიძლება გეფიქრა, რომ, ამ მხრივ, პრობლემა გვქონდა”. სეტიენის სრული კომენტარი.

სერხიო გონსალესი: “სიტყვა, რომლითაც “ბარსას” საუკეთესოდ დახასიათებას შევძლებთ არის – გუნდი უამრავი ტალანტით”. სერხიო გონსალესის კომენტარი.

სავარაუდო შემადგენლობები

ვალიადოლიდი (4-2-3-1): მასიპი, მოიანო, ფერნანდესი, სანჩესი, გარსია, ალკარასი, ემეტერიო, ერვიასი, პლანიო, ვილია, გვარდიოლა.

ბარსელონა (4-3-1-2): ტერ შტეგენი, ს. რობერტო, პიკე, ლანგლე, ალბა, ბუსკეტსი, ვიდალი, პუჩი, მესი, გრიზმანი, სუარესი.

პროგნოზი

Whoscored: 1-2

Sportsmole: 0-2

Sportskeeda: 0-2

ტრანსლაცია

თამაში თბილისის დროით 21:30 საათზე დაიწყება და მის პირდაპირ რეპორტაჟს სილქ სპორტ 1 და www.silksport.ge (უფასოდ) წარმოგიდგენთ