“ბარსელონას” სატრანსფერო პრობლემები

კორონავირუსმა ყველა კლუბს გაურთულა საქმე, მაგრამ “ბარსელონა” განსაკუთრებით რთულ მდგომარეობაშია. კლუბი სხვებთან შედარებით, მოუმზადებელი შეხვდა კრიზისს და ამას სკანდალებიც თან დაერთო. ახლოვდება არჩევნები და ბართომეუს, რა თქმა უნდა სურს, დასამახსოვრებელი ტრანსფერების განხორციელება, მაგრამ ამ პირობებში, ეს ძალიან რთული იქნება.

“ბარსას” სამიზნეებზე, უკვე დიდი ხანია ყველაფერი ვიცით, მაგრამ გასაშვებ ფეხბურთელებზე ვერც ხელმძღვანელობა ჩამოყალიბდა, ვერც მწვრთნელი და ვერც თავად ფეხბურთელები, რადგან თითოეული მათგანი აცხადებს, რომ “ბარსას” დატოვება არ სურს.

სემედუ იყო ერთადერთი, რომელმაც მცირე ხნის წინ, “ბენფიკაში” დაბრუნების სურვილი გამოთქვა, მაგრამ მის აგენტსაც სხვა გეგმები აქვს და “ბარსას” ხელმძღვანელობასაც.

როგორც მილანის “ინტერს”, ისე ტურინის “იუვენტუსს”, პირველ რიგში, არტურის ხელში ჩაგდება სურთ, მაგრამ თავად ბრაზილიელი მუდმივად აცხადებს, რომ “ბარსას” არ დატოვებს, თუმცა, კლუბი მის მიმართ ასეთივე ერთგული არ არის.

“ინტერთან” მიმართებაში გაიჟღერა სხვა ფეხბურთელების გვარებმაც და სავარაუდოდ, სატრანსფერო ფანჯრის გახსნამდე, ეს გვარები კიდევ შეიცვლება.

“ბარსა” ვერ ახერხებს, სხვა ტრანსფერების განხორციელებასაც, რომელიც ერთი შეხედვით მარტივი უნდა ყოფილიყო. ტობიდოს “შალკე” აღარ იყიდის, თანხა, რომელიც მათთვის მისაღები იყო და ტობიდოს კონტრაქტში იყო მითითებული, კორონავირუსის დროს, უკვე მიუღებელი გახდა.

შესაბამისად, მისი მომავალი გაურკვეველია.

ვრცელდება ხმები, რომ ტობიდოს მიმართ ინტერესს “ევერტონი” გამოთქვამს, რაც გასაკვირი არ არის. მერსისაიდელებმა “ბარსადან” ლუკა დინი, იერი მინა და ანდრე გომეში შეიძინეს, სამივე მათგანმა გაამართლა, ამჯერად ტობიდოს მიმართ აქვთ ინტერესი, მაგრამ საქმე ოფიციალურ შეთავაზებამდე არ მისულა.

“იუვენტუსს” კი ტობიდო არ აინტერესებს.

“ინტერთან” მიმართებაში, შესაძლოა, აქტუალური გახდეს რაფინიას ტრანსფერი. ბრაზილიელი უკვე იყო “ინტერში” განათხოვრებული და კარგი შთაბეჭდილებაც დატოვა, ამიტომ არაა გამორიცხული, სწორედ ის აღმოჩნდეს ფეხბურთელი, რომელიც ლაუტაროს ტრანსფერში ჩაერთვება.

როგორც MD ავრცელებს, “ბარსას” სურს, ნელსონ სემედუ 50 მილიონ ევროდ შეაფასოს. ეს კლუბს დაეხმარება, ფეხბურთელი რომელიმე ვარსკვლავის ტრანსფერში ჩართოს, მაგალითად ნეიმარის, პსჟ ხომ სემედუთი ყოველთვის ინტერესდებოდა?!

გაურკვევლობაა რაკიტიჩის, უმტიტისა და ვიდალის გარშემოც. კონტეს უყვარს ვიდალი, მაგრამ “ინტერის” ხელმძღვანელობას, მისი გამოყენება, ლაუტაროს ტრანსფერში არ სურს. რაკიტიჩს კი დარჩენა სურს, ამიტომ კლუბზე, ცოტა არ იყოს, ნაწყენია.