დანი ალვესიდან როდრიმდე: ტრანსფერები, რომლებიც ბარსელონამ რეალ მადრიდს მოულოდნელად მოუგო

“ბარსელონაში” როდრი ერნანდესის შესაძლო ტრანსფერმა ბოლო პერიოდისთვის უჩვეულო სცენარი გააცოცხლა – ფეხბურთელი, რომელიც თითქოს “რეალ მადრიდში” უნდა გადასულიყო, ბოლო მომენტში გადაწყვეტილებას ცვლის და კატალონიური კლუბის მაისურს ირჩევს.

ეს ხშირად არ ხდება. ბოლო ორი ათწლეულის განმავლობაში მხოლოდ რამდენიმე ისეთი შემთხვევა მოიძებნება, როდესაც “ბარსელონამ” მოახერხა იმ მოლაპარაკებების შემოტრიალება, რომელზეც მადრიდელები დიდი ხნის განმავლობაში მუშაობდნენ. ეს სია მოკლეა, მაგრამ ის ამტკიცებს, რომ სანამ კონტრაქტზე ხელი არ მოეწერება, ყველაფერი შეიძლება შეიცვალოს.

როდრი – დიდი გარდატეხა

ივნისის შუა რიცხვებიდან როდრი მადრიდელებისთვის ნახევარდაცვის გასაძლიერებლად მთავარი სამიზნე იყო და ვალდებებასზე დარწმუნებულნი იყვნენ, რომ თუ ესპანელი “მანჩესტერ სიტის” დატოვებდა, მისი შემდეგი გაჩერება “სანტიაგო ბერნაბეუ” იქნებოდა. ივლისის პირველ ნახევარში მის გარემოცვასთან პირველი კონტაქტები შედგა, რაც მსოფლიო ჩემპიონატის შემდეგ კიდევ უფრო გააქტიურდა და საქმე პირობების შეთანხმებამდეც კი მივიდა.

კვირების გასვლასთან ერთად ტრანსფერი არ სრულდებოდა და საქმეში “ბარსელონა” ჩაერთო. ჰანსი ფლიკმა პირადად აუხსნა ფეხბურთელს, თუ რა როლი ექნებოდა მის პროექტში და კატალონიურმა კლუბმა გადამწყვეტ მომენტში მოლაპარაკებები დააჩქარა. ვითარება საბოლოოდ შეიცვალა, როდესაც როდრიმ არჩევანი “სპოტიფაი კამპ ნოუს” სასარგებლოდ გააკეთა. ეს ბაზრის ერთ-ერთი ყველაზე მოულოდნელი ტრანსფერია, თუმცა კლუბებს შორის საბოლოო შეთანხმება ჯერ კიდევ მისაღწევია.

ანდრე გომეში – ყველაზე მსგავსი პრეცედენტი

თუ არსებობს როდრის საქმის ნამდვილად მსგავსი შემთხვევა, ეს ანდრე გომეშის ტრანსფერია. ნახევარმცველი პორტუგალიის ნაკრებთან ერთად ევროპის ჩემპიონი ახალი გამხდარი იყო და მის მიმართ ინტერესი ნახევარ ევროპას ჰქონდა, თუმცა ფავორიტად “რეალ მადრიდი” მიიჩნეოდა. ივლისის დასაწყისიდან ზინედინ ზიდანმა ტრანსფერს მწვანე შუქი აუნთო და ჟორჟე მენდეში მუდმივ კონტაქტზე იყო მადრიდელებთან და “ვალენსიასთან”, რათა ყველა მხარისთვის მისაღები ფორმულა მოეძებნა.

2016 წლის 16 ივლისს MARCA და სხვა გამოცემები წერდნენ, რომ უპირატესობას “რეალ მადრიდი” ფლობდა. “ვალენსია” დაახლოებით 65 მილიონ ევროს ითხოვდა, მადრიდელებმა კი ეს პირობები გადაჭარბებულად ჩათვალეს, რამაც მოლაპარაკებები შეაფერხა.

სწორედ ამ დროს გამოჩნდა “ბარსელონა”. ლუის ენრიკემ ტრანსფერი პირადად მოითხოვა, რობერტ ფერნანდესმა კონტაქტები დააჩქარა და სულ რაღაც რამდენიმე დღეში სცენარი სრულად შეიცვალა. 2016 წლის 21 ივლისს “ბარსელონამ” მისი დამატება ოფიციალურად გამოაცხადა 35 მილიონი ევროს (პლუს 20 მილიონი ბონუსების სახით) სანაცვლოდ.

ნეიმარი და ორწლიანი ბრძოლა

ძალიან ცოტა ტრანსფერი თუ ასახავს “ბარსელონასა” და “რეალ მადრიდს” შორის არსებულ საფეხბურთო დაპირისპირებას ისე კარგად, როგორც ნეიმარის შემთხვევა. სანამ ბრაზილიელი ევროპაში ჩამოვიდოდა, ფლორენტინო პერესმა მისი დამატება სტრატეგიულ მიზნად აქცია. 2011 წლის ნოემბერში “რეალ მადრიდმა” “სანტოსს” “ბარსელონაზე” გაცილებით უკეთესი ფინანსური წინადადება შესთავაზა და თვეების განმავლობაში აწარმოებდა მოლაპარაკებებს როგორც კლუბთან, ისე მოთამაშის გარემოცვასთან – ნეიმარმა სამედიცინო შემოწმებაც კი გაიარა.

მაშინ, როცა “რეალ მადრიდი” ფინანსური უპირატესობის იმედზე იყო, “ბარსელონამ” სრულიად სხვა სტრატეგია აირჩია. სანდრო როსელი და რაულ სანლეი ჩუმად მუშაობდნენ და 2011 წლის ბოლოს მათ მოთამაშის გარემოცვასთან წინასწარ შეთანხმებას მიაღწიეს.

ბრძოლა მთელი 2012 წლის განმავლობაში გაგრძელდა. “რეალ მადრიდი” უფრო მაღალი შეთავაზებით ზეწოლას აგრძელებდა, მაგრამ “ბარსელონაში” დარწმუნებულნი იყვნენ, რომ ფეხბურთელს კატალონიაში თამაში სურდა.

კვანძი 2013 წლის მაისში გაიხსნა. 25 მაისს “სანტოსმა” განაცხადა, რომ ტრანსფერზე მოსალაპარაკებლად მზად იყო და ორივე გრანდმა საბოლოო წინადადებები წარადგინა. სულ რაღაც 24 საათში, 26 მაისს, ნეიმარმა საჯაროდ განაცხადა, რომ “ბარსელონაში” ითამაშებდა. წლების შემდეგ მან აღიარა, რომ “რეალ მადრიდის” ფინანსური წინადადება უკეთესი იყო და მას “სუფთა ჩეკიც” კი უწოდა, თუმცა პრიორიტეტი სპორტულ პროექტსა და ლეო მესისთან ერთად თამაშს მიანიჭა.

დავიდ ვილია – ფასი და შანსი მომდევნო წელს

2009 წლის ივნისში “რეალ მადრიდის” პრეზიდენტად ფლორენტინო პერესის დაბრუნებამ ბაზარი შეცვალა. კაკასა და კრიშტიანუ რონალდუს ტრანსფერების შემდეგ, შემდეგი დიდი სამიზნე დავიდ ვილია იყო, რომელმაც თავი “ვალენსიაში” და 2008 წლის ევროპის ჩემპიონატზე საუკეთესო ესპანელ თავდამსხმელად დაიმკვიდრა.

ივნისსა და ივლისში “რეალ მადრიდი” “ვალენსიასთან” ინტენსიურად აწარმოებდა მოლაპარაკებებს. მიზანი კრიშტიანუსთან ერთად საოცნებო შეტევის შექმნა იყო. “ვალენსიას” ეკონომიკური პრობლემების გამო ფულის მიღება სჭირდებოდა, მაგრამ საკუთარ ვარსკვლავში მადრიდელების მიერ შეთავაზებულ 40 მილიონ ევროზე მეტს ითხოვდა.

მოლაპარაკებები ჩაიშალა და ვილია კიდევ ერთი სეზონით “მესტალიაზე” დარჩა. ამან “ბარსელონასთვის” მოულოდნელი შანსი გააჩინა. პეპ გვარდიოლამ მოძრავი, გოლის ალღოს მქონე და გამოცდილი თავდამსხმელი მოითხოვა. 2010 წლის გაზაფხულზე “ბარსელონამ” კონტაქტი განაახლა და 19 მაისს დავიდ ვილიას ტრანსფერი 40 მილიონ ევროდ ოფიციალურად დაადასტურა.

დანი ალვესი – ერთწლიანი მცდელობები

სანამ “სპოტიფაი კამპ ნოუს” ლეგენდა გახდებოდა, დანი ალვესიც ძალიან ახლოს იყო “რეალ მადრიდთან”. 2007 წლის ზაფხულში რამონ კალდერონმა და პრედრაგ მიატოვიჩმა “სევილიასთან” ბრაზილიელის ტრანსფერზე პირველი კონტაქტი დაამყარეს.

“რეალ მადრიდი” ხოსე მარია დელ ნიდოსთან თვეების განმავლობაში აწარმოებდა მოლაპარაკებებს, მაგრამ ფასი ყოველთვის დაუძლეველ ბარიერად რჩებოდა. “სევილიას” პრეზიდენტი დაკლებას არ აპირებდა.

იმ ზაფხულში პეპ გვარდიოლა გამოჩნდა. “ბარსელონას” ახალმა მწვრთნელმა ალვესის დამატება მარჯვენა ფლანგის ტრანსფორმაციისთვის აბსოლუტურ პრიორიტეტად აქცია. “რეალ მადრიდისგან” განსხვავებით, “ბარსელონა” დათანხმდა “სევილიას” ფინანსურ მოთხოვნებს და 2008 წლის 2 ივლისს ტრანსფერი 32 მილიონ ევროდ (პლუს ბონუსები) დაიხურა, რაც იმ დროისთვის მცველისთვის სარეკორდო მაჩვენებელი იყო.