რომელ ფეხბურთელებს აკვირდება “ბარსელონა” თავისუფალი აგენტების ბაზარზე

კორონავირუსის პანდემიის მიერ გამოწვეული ზარალის ფონზე, შესაძლოა, “ბარსელონამ” პრიორიტეტული სამიზნეების ყიდვა ვერ შეძლოს.

Diario Sport-ის ცნობით, კატალონიელები, დიდი ალბათობით, თავისუფალი აგენტების ბაზარზე გადაერთვებიან. “ბლაუგრანა” უკვე 8 გამოცდილ ფეხბურთელს აკვირდება. 

ესენი არიან: მცველები – ტიაგუ სილვა, იან ვერტონგენი, ტომას მუნიე, ნახევარმცველი – დავიდ სილვა, თავდამსხმელები – პედრო, ვილიანი, ედინსონ კავანი, ოლივიე ჟირუ, დრის მერტენსი.

როგორც ცნობილია, ტიაგუ სილვა “კამპ ნოუზე” თამაშზე ოცნებობს. “ბარსას” მისი გამოცდილების გამოყენება შეეძლება. თუმცა, პსჟ-ს მასთან დაკავშირებით გადაწყვეტილება ჯერ არ მიუღია. ტომას მუნიე კი პარიზულ კლუბს ნამდვილად დატოვებს.

ვერტონგენს განსაკუთრებული უნარი აქვს – ის უნივერსალია და ბელგიელს როგორც ცენტრალურ, ისე მარცხენა მცველად თამაში შეუძლია.

რაც შეეხება დავიდ სილვას, როგორც ჩანს, პეპ გვარდიოლას ესპანელი ნახევარმცველი აღარ სჭირდება, რის გამოც “ვალენსიას” ყოფილმა ფეხბურთელმა, შესაძლოა, სამშობლოში დაბრუნება გადაწყვიტოს.

“ჩელსის” ვარსკვლავით, ვილიანით “ბარსელონა” დიდი ხანია ინტერესდება, ხოლო პედრო “ლა მასიელია”, რაც იმას ნიშნავს, რომ ადაპტაცია არ გაუჭირდება.

და ბოლოს, თავდამსხმელები – ედინსონ კავანი, ოლივიე ჟირუ და დრის მერტენსი, შესაძლოა, “ლურჯ-ბროწეულისფერთა” სტილში იდეალურად არ ჯდებიან, თუმცა მათ დიდი გამოცდილება აქვთ. 

საერთო ჯამში, თითოეულ ხსენებულ მოთამაშეს “ბარსელონას” გაძლიერება შეუძლია, თუმცა ყველა მათგანი, დიდი ალბთობით, მაღალ ხელფასს მოითხოვს.