Marca-ს გამო მესის "ოქროს ბუცზე" ერთი გოლი დააკლდა

"ბარსელონას" არგენტინელ ვარსკვლავს, ლიონელ მესის, "ოქროს ბუცისთვის" ბრძოლაში გატანილზე ერთით ნაკლები გოლი აქვს დაფიქსირებული, რისი მიზეზით მადრიდული სპორტული გამოცემა Marca არის.

ლა ლიგის მიმდინარე გათამაშებაში მესიმ 31 გოლი გაიტანა, მაგრამ "ოქროს ბუცის" ჩათვლაში მას 30 გოლი უფიქსირდება. საქმე ისაა, რომ ამ რეიტინგს European Sports Magazine ადგენს, რომლის წევრიც ესპანეთიდან "მარკაა". ეს გამოცემა მადრიდის "რეალის" მიმართ თავისი სიმპათიებითაა ცნობილი და არაერთხელ დაფიქსირებულა შემთხვევა, როცა ის "რეალში" მოთამაშე რონალდუს ოფიციალურზე მეტ გოლს უთვლიდა, "ბარსელონას" ლიდერ მესის კი პირიქით - აკლებდა. ასე მოხდა ამჯერადაც. გუშინ, "ესპანიოლის" კარში გასული პირველი გოლი ყველამ, მათ შორის ესპანეთის ლა ლიგამაც მესის ჩაუთვალა, მაგრამ Marca-მ ის ავტოგოლად მიიჩნია. შედეგად, არგენტინელს "ოქროს ბუცის" რეიტინგში 30 გოლი აქვს დაფიქსირებული. უახლოესი მდევარი კილიან მბაპეა 26 გოლით.