ფრენკი დე იონგის გამონათქვამები "ბარსელონაზე"

ბოლო დროს გავრცელებულ ცნობებს თუ დავუჯერებთ, "აიაქსის" ახალგაზრდა ნახევარმცველი ფრენკი დე იონგი "ბარსელონაში" გადასვლასთან ძალიან ახლოსაა.

21 წლის ფეხბურთელს კატალონიური კლუბის მიმართ სიმპათიები არასდროს დაუმალავს. თვალი გადავავლოთ მის მიერ "ბარსელონასთან" დაკავშირებით გაკეთებულ კომენტარებს.

2018 წლის იანვარი: "მესი თუ რონალდუ? რა თქმა უნდა, მესი. ის რონალდუზე ბევრად უკეთესია."

2018 წლის იანვარი: "რომელ ჩემპიონატში მინდა ერედივიზიონის შემდეგ თამაში? ლა ლიგაში - კარგი ამინდი, კარგი ფეხბურთი. მიმაჩნია, რომ ესპანური ფეხბურთის დონე ინგლისისას აღემატება."

2018 წლის იანვარი: "ვის გავუცვლიდი ცხოვრებას ერთი დღით, ეს რომ შემეძლოს? მესის. მაინტერესებს, როგორია, იყო იმდენად კარგი, რამდენად კარგიც ისაა."

2018 წლის აპრილი: "არდადეგებს ესპანეთში ვატარებდით და ბაბუამ მესის 30-ნომრიანი მაისური მიყიდა. მან იცოდა, რომ მესი მომწონდა და პატარაობაში ამ ფორმას ვატარებდი. რა თქმა უნდა, მასთან ერთად თამაში მინდა. ის უკვე 31 წლისაა და უნდა ვიჩქარო.

2018 წლის აპრილი: "მამაჩემის აზრით, კრუიფი ხელშეუხებელია. ის მასთან ერთად გაიზარდა. მამა მეუბნება, რომ მესის კრუიფის ქარიზმა არ აქვს. ის ამბობს, რომ კრუიფი სხვებს უკეთ თამაშის საშუალებას აძლევდა. ჩემი პასუხი კი არის, რომ მესის სხვები არ სჭირდება.

2018 წლის ივლისი: "აიაქსის" ფეხბურთელი ვარ, მაგრამ აშაკარაა, რომ "ბარსელონას" მხრიდან ინტერესი არის. ყველამ იცის, რომ ცოტა ხნის წინ ბარსელონაში ვიყავი და ძალიან მომეწონა. ეს ძალიან ლამაზი ქალაქია კარგი სანაპიროთი."

2018 წლის ივლისი: "ჩავის ქება ჩემ მიმართ? მისი ამ სიტყვების წაკითხვა ძალიან სასიამოვნო იყო. მისი ბევრი მატჩი მაქვს ნანახი როდესაც ის ინიესტასთან, ბუსკეტსთან და მესისთან ერთად თამაშობდა."

2018 წლის აგვისტო: "ვფიქრობ, ამ სეზონს ჰოლანდიაში, "აიაქსთან" ერთად ჩავატარებ. რა თქმა უნდა, "ბარსელონაში" გადასვლა, ჩემს კარიერაში, წინგადადგმული დიდი ნაბიჯი იქნებოდა."

2018 წლის აგვისტო: "ბარსელონაში" თამაში მინდა და იქნებ ერთ დღეს ეს მოხდეს კიდეც, მაგრამ არა ამ სეზონში."

2018 წლის სექტემბერი: "თუ დიდ გუნდში ითამაშებ, შენი თანაგუნდელები დიდი ფეხბურთელები იქნებიან. ოდესმე მესისთან ერთად სიამოვნებით ვითამაშებდი."

დე იონგის ეს განცხადებები არ ტოვებს კითხვებს იმასთან დაკავშირებით, თუ სად სურს მას კარიერის გაგრძელება.