სასამართლო არტურო ვიდალის 4 სახლის გაყიდვას აპირებს

"ბარსელონას" ჩილელ ნახევარმცველს, არტურო ვიდალს, ტურინში პრობლემები აქვს. იმ დროის განამვლობაში, როდესაც ვიდალი "იუვენტუსში" თამაშობდა (2011-2015) მას დავალიანება დაუგროვდა, რის გამოც მის უძრავ ქონებას გაყიდვა ემუქრება.

ადგილობრივ ტურისტულ სააგენტოსთან ვიდალის თავდაპირველი დავალიანება 17 045 ევრო იყო, რაც საურავის დარიცხვის შემდეგ 18 489 ევრო გახდა. ამას დაემატა სასამართლოს ხარჯები 12 058 ევროს ოდენობით.

Marca-ს მიერ გავრცელებული ინფორმაციით, ტურინის სასამართლომ ვიდალის 4 სახლს ყადაღა დაადო და დავალიანების გასტუმრების მიზნით მათი აუქციონზე გაყიდვა იგეგმება.

ასეთი მკაცრი ზომების მიღება მას შემდეგ გახდა საჭირო, რაც ვიდალმა 24 დეკემბერს მისთვის გაგზავნილი ბოლო შეტყობინებაც უყურადღებოდ დატოვა.