განსაკუთრებული თამაში ტაკეფუსა კუბოსთვის

დღეს, ღამის 12 საათზე, “ბარსელონა”, ლა ლიგის მე-16 ტურის მატჩში, “მალიორკას” უმასპინძლებს.

სტუმართა განაცხადში მოხვდა 18 წლის იაპონელი შემტევი ტაკეფუსა კუბო, რომლისთვისაც დღევანდელი დაპირისპირება განსაკუთრებული იქნება.

კუბო, 2011-2015 წლებში, 10-დან 14 წლამდე, “ბარსელონას” აკადემიაში თამაშობდა. 2015 წელს, FIFA-ს მიერ დაწესებული აკრძალვის გამო, მას “ბლაუგრანაში” თამაშის უფლება აღარ ჰქონდა და ფეხბურთელი იძულებული გახდა სამშობლოში დაბრუნებულიყო.

გასულ ზაფხულში, “ბარსელონა” კუბოს კიდევ ერთხელ დამატებას ცდილობდა, მაგრამ აზიელმა ამომავალმა ვარსკვლავმა კატალონიაში დაბრუნებას “რეალში” გადასვლა ამჯობინა. მალევე, მადრიდელებმა ის “მალიორკაში” გაანათხოვრეს.

ლა ლიგის გასულ 15 ტურში, კუბომ 12-ჯერ ითამაშა, აქედან 6-ჯერ სასტარტო შემადგენლობაში. 18 წლის ფეხბურთელმა თავი 1 გოლითა და ამდენივე საგოლე გადაცემით გამოიჩინა.