"ბარსას" მომავალი ცენტრფორვარდობის ორი კანდიდატი

კატალონიური გრანდი სამომავლო პერსპექტივის მქონე ფეხბურთელებს ეძებს, რომლებიც გუნდს დახმარებას აწმყოშიც გაუწევენ. ცხადია, ლუის სუარესის გუნდიდან წასვლა არავის სურს, მაგრამ ურუგვაელი ფორვარდი უკვე 31 წლისაა და მიმდინარე წელს საუკეთესო სეზონს ნამდვილად ვერ ატარებს.

"ბარსელონას" სურს, გუნდში ახალგაზრდა თავდამსხმელი მოვიდეს, რომელსაც უკვე თავისი ტალანტი და დონე დამტკიცებული აქვს. ფეხბურთელი, რომელიც გუნდში დიდი ხნით დარჩება. უნდა აღინიშნოს ისიც, რომ "ბარსელონას" ევროპის გარეთ ქვეყნების მოქალაქე ფეხბურთელების ლიმიტი უკვე ამოწურული აქვს - გუნდის შემადგენლობაში მალკომი, არტური და არტურო ვიდალი ირიცხებიან. ამიტომაც, კატალონიელები კონტინენტს გარეთ კანდიდატების ძებნას ვერ დაიწყებენ. ასაკით და პროფილით, ჰარი კეინი იდეალური ვარიანტი იქნებოდა, თუმცა მისი ტრანსფერი ასტრონომიული თანხა დაჯდებოდა და ამის გამო ეს ნაკლებად წარმოსადგენია.

სხვადასხვა ვარიანტების ნახსენებ ორ "ფილტრში" გატარების შემდეგ ესპანური პრესა ორ კანდიდატს გვთავაზობს, რომლებიც წესით "ბარსელონას" მთავარ გუნდს კარგად უნდა მოერგონ. ერთ-ერთი მათგანი ახალგაზრდა პოლონელი ფორვარდი, კშიშტოფ პიონტეკია, რომელიც გასულ ზაფხულში "ჯენოაში" "კრაკოვიდან" გადავიდა 4.5 მილიონი ევროს სანაცვლოდ და იტალიურ გუნდში ჩატარებულ 8 შეხვედრაში უკვე 13 გოლი აქვს გატანილი, რაც ნიშნავს, რომ საშუალოდ ყოველ 53 წუთში გააქვს. ეროვნულ ნაკრებში სადებიუტო გოლის გასატანად კი 18 წუთი დასჭირდა. ფეხბურთელი სათამაშო სტილით ძალიან ჰგავს ლუის სუარესს და უკვე გრანდების ყურადღებაც მიიქცია. ნუ დაგვავიწყდება, რომ "ჯენოა" ტრადიციულად "ფეხბურთელების გამყიდველი" კლუბია და ტრანსფერი დაახლოებით 50-60 მილიონი დაჯდება.

კიდევ ერთი სახელი, რომელიც "ბარსას" დაუკავშირეს, ნიკოლას პეპეა. "ლილის" შემტევი ლიგა 1-ში მეორე სეზონს ატარებს. თუ პიონტეკი უფრო მომენტის დამსრულებელი, ე.წ. "ცხრიანია", პეპე უფრო მრავალმხრივობით გამოირჩევა და მეორე თავდამსხმელადაც შეუძლია თამაში. ფეხბურთელი ასისტების რაოდენობითაც გამოირჩევა - მის ანგარიშზე 6 გოლი და 6 ასისტია.

ორივე ფეხბურთელზე "ბარსელონას" კონკურენციის გაწევა გრანდებისთვის მოუწევს. პეპეს შემთხვევაში, "ბაიერნმა" უკვე გადადგა პირველი ნაბიჯები სამომავლოდ ტრანსფერის განხორციელებისთვის. მიუნხენელებმა მიმდინარე სეზონი კარგად ნამდვილად ვერ დაიწყეს და აპირებენ, გუნდი ზამთრის სატრანსფერო ფანჯარაზე გააძლიერონ. ტრანსფერის სავარაუდო ღირებულება 30 მილიონი ევროა.