ლეო მესი - ფინალების მეფე

როდესაც საქმე ფინალს ეხება, პროგნოზების გაკეთება უფრო რთული ხდება, რადგან ფინალამდე მისული გუნდი საკმარისად ძლიერი ყოველთვის არის იმისათვის, რომ ერთ მატჩში ნებისმიერი მეტოქე დაამარცხოს. თუმცა, თუ ფინალურ შეხვედრაში ლეო მესი მონაწილეობს, ძალთა თანაფარდობა მნიშვნელოვნად იცვლება.

მესის, "ბარსელონას" მაისურით, 17 ერთმატჩიანი ფინალი აქვს ჩატარებული და 14 მათგანი კატალონიური გუნდის გამარჯვებით დასრულდა. 9 ორმატჩიანი ფინალიდან კი "ბარსას" გამარჯვება 6-ჯერ დარჩა. სულ, ფინალში გამართული 26 თამაშიდან მესიმ 20 მოიგო.

ლეო მესის, "ბარსელონას" შემადგენლობაში, ზედიზედ 6 ერთმატჩიანი ფინალი აქვს მოგებული "ბილბაოს", "იუვენტუსის", "სევილიას", "რივერ პლეიტის", კვლავ "სევილიასა" და "ალავესის" წინააღმდეგ. ყველა ამ შეხვედრაში არგენტინელმა თავი ან გოლით გამოიჩინა, ან საგოლე გადაცემით.

თუ მესიმ ზედიზედ მეშვიდე ფინალიც მოიგო, ეს მის კარიერაში რიგით 31-ე ტიტული იქნება.