ნასერ ალ-ხელაიფსა და ბართომეუს შორის ურთიერთობა იძაბება

როგორც ჩანს, მარკო ვერატის ირგვლის ატეხილმა აჟიოტაჟმა, პსჟ-ს პრეზიდენტის, ნასერ ალ-ხელაიფის გაბრაზება გამოიწვია და “ბარსელონასა” და ფრანგული კლუბის ხელმძღვანელებს შორის ურთიერთობა იძაბება. ეს ვითარება არც ახლა დაწყებულა და შესაძლოა 31 აგვისტომდე კიდევ უფრო მეტად გამძაფრდეს. პარიზში მთავარ პრიორიტეტად ვერატის შენარჩუნება მიაჩნიათ და ფიქრობენ კიდეც, რომ იტალიელის გადარწმუნებას შეეცდებიან. კატალონიაში კი პირიქით, ცდილობენ, რომ ყველა ხელსაყრელი მომენტი გამოიყენონ და მომავალ სეზონში ფეხბურთელმა ლურჯ-ბროწეულისფერი ფორმა მოირგოს.

არც ნასერ ალ-ხელაიფის სიბრაზეა კატალონიელებისადმი ახალი. მით უმეტეს, რომ ეს პირველი შემთხვევა არაა, როცა “ბლაუგრანა” პარიზელთა ფეხბურთელით ინტერესდება – ტიაგო სილვა, მარკინიოსი და ახლა უკვე ვერატიც. თავად ფეხბურთელი ბარსაში თამაშის სურვილს არ მალავს, თუმცა იგი პსჟ-ს პრეზიდენტის სამომავლო გეგმებში შედის და ასე მარტივად არ აპირებს გააძლიეროს გუნდი, რომელთანაც 4-0 უპირატესობა გაანიავა და რომელმაც 8 მარტს ისტორიული ქამ-ბექი შემოგვთავაზა (6-1).

აღნიშნულ საკითხზე, როგორც უკვე იცით, კომენტარი გააკეთა პარიზელთა ყოფილმა სპორტულმა დირექტორმა, პატრიკ კლუივერტმა. 1998-2004 წლებში “ბარსელონას” თავდამსხმელმა, თავისი ყოფილი კლუბის იმედები მინიმუმზე დაიყვანა. მისი თქმით, ვერატის მართლაც სურს “ბარსელონაში” თამაში, მაგრამ ალ-ხელაიფი იტალიელს ასე მარტივად არ შეელევა. ასევე კლუივერტმა დაამატა, რომ მისი აზრით ვერატის ფასი 80 მილიონზე ბევრად მეტია და ის ფეხბურთელში 100 მილიონზე მეტსაც კი გადაიხდიდა.