“ბარსელონამ” პსჟ-სა და “რეალ მადრიდთან” განცდილი მარცხების შემდეგ ორდღიანი დასვენება დაასრულა და ვარჯიში განაახლა. ჟოან გამპერის სახელობის სპორტულ კომპლექსში გამართულ საწვრთნელ სესიაზე რამდენიმე სიახლე იყო: ჟიულ კუნდე კვლავ გუნდს მიღმაა, პაუ კუბარსიმ ვარჯიში ჩვეულებრივ რეჟიმში განაახლა, ხოლო პირველ გუნდს სარეზერვო შემადგენლობის სამი ახალგაზრდა ფეხბურთელი შეუერთდა.
მთავარი გაურკვევლობა კვლავ ჟიულ კუნდეს უკავშირდება. ფრანგი მცველი, რომელმაც “ბეტისთან” შეხვედრაში კოჭი დაიზიანა და ამის გამო პსჟ-სა და “რეალ მადრიდთან” მატჩები გამოტოვა, გუნდთან ერთად ჯერ კიდევ ვერ ვარჯიშობს.
კუნდეს მდგომარეობა უახლოეს დღეებში შეფასდება, რის შემდეგაც გაირკვევა, შეძლებს თუ არა ის შაბათს, “ალავესთან” გასამართ მატჩში მონაწილეობას. ფრანგის დაბრუნება კლასიკოს წინაც ბოლო მომენტამდე საეჭვო იყო, თუმცა დამატებითი დრო მას გამოჯანმრთელებისა და მოედანზე დაბრუნების უკეთეს შესაძლებლობას აძლევს.
ბარსელონას დაცვის ხაზში ოთხი ფეხბურთელია ტრავმირებული
“ბარსელონას” სამწვრთნელო შტაბს დაცვის ხაზში სერიოზული საკადრო პრობლემები აქვს. ამჟამად სხვადასხვა ტრავმის გამო ოთხი მცველი ვერ თამაშობს: ჩავი ესპარტი, ერიკ გარსია, ჟიულ კუნდე და ანდრეას კრისტენსენი.
ტრავმირებულთა სიას ბოლოს ჩავი ესპარტი დაემატა. ახალგაზრდა ფეხბურთელმა “რეალ მადრიდთან” შეხვედრაში, ორელიენ ჩუამენის უხეში ვარდნის შედეგად, მარჯვენა კოჭის სინდეზმოზი დაიზიანა და დაახლოებით შვიდი კვირა გაუცდება.
ესპარტის ტრავმა ჰანსი ფლიკისთვის კიდევ ერთი სერიოზული პრობლემაა. გერმანელ სპეციალისტს დაცვის ხაზში ფეხბურთელების დაბრუნება სასწრაფოდ სჭირდება, რის გამოც კუნდეს შესაძლო გამოჯანმრთელებას განსაკუთრებული მნიშვნელობა ენიჭება. თუმცა ფლიკს გადაწყვეტილების მიღებამდე ფრანგის ფიზიკური მდგომარეობის საფუძვლიანად შეფასება მოუწევს.
დადებითი სიახლე პაუ კუბარსის უკავშირდება. ახალგაზრდა ცენტრალურმა მცველმა, რომელმაც სიცხის გამო ორშაბათს ლონდონში გამართულ “ოქროს ბურთის” დაჯილდოებაზე გამგზავრებაზე უარი თქვა, გუნდთან ერთად სრული დატვირთვით ივარჯიშა.
საწვრთნელ სესიაში მონაწილეობა მიიღეს სარეზერვო გუნდის სამმა ფეხბურთელმაც: ნახევარმცველმა ებრიმა ტუნკარამ, ცენტრალურმა მცველმა ალექს კამპოსმა და ეგვიპტელმა თავდამსხმელმა ჰამზა აბდელკარიმმა. სამივე ახალგაზრდა ბოლო პერიოდში პირველი გუნდის ვარჯიშებში რეგულარულად მონაწილეობს.
ამჟამად “ბარსელონა” მთლიანად “ალავესთან” შეხვედრისთვის ემზადება. მატჩი 31 ოქტომბერს, თბილისის დროით 23:55 საათზე, “სპოტიფაი კამპ ნოუზე” გაიმართება.
კატალონიელთა მიზანი ბოლო ორი მარცხის შემდეგ გამარჯვების გზაზე დაბრუნება და ლა ლიგაში ლიდერობის შენარჩუნებაა.
“ალავესთან” შეხვედრის შემდეგ ჰანსი ფლიკის გუნდს სანაკრებო პაუზამდე კიდევ ორი მნიშვნელოვანი დაპირისპირება ელის: “ასტონ ვილასთან” და მადრიდის “ატლეტიკოსთან”.
forum კომენტარები (0)