ოფიციალურად: ჰანსი ფლიკმა ბარსელონასთან კონტრაქტი გაახანგრძლივა

“ბარსელონამ” და ჰანსი ფლიკმა მიაღწიეს შეთანხმებას კონტრაქტის გახანგრძლივების თაობაზე, რომელიც მას კლუბთან 2028 წლის 30 ივნისამდე დააკავშირებს, კიდევ ერთი დამატებითი სეზონის შესაძლებლობით.

გერმანელმა ახალ კონტრაქტს ხელი დღეს კლუბის ოფისებში მოაწერა. ცერემონიას ესწრებოდნენ “ბარსელონას” პრეზიდენტი რაფა იუსტე, საფეხბურთო დირექტორი ანდერსონ ლუის დე სოუზა “დეკუ” და სპორტული კომისიის სხვა წევრები. შეხვედრას ასევე ესწრებოდა არჩეული პრეზიდენტი ჟოან ლაპორტა.

ჰანსი ფლიკი: “ამ მოგზაურობის გაგრძელება დიდი სიამოვნებაა”

ჰანსი ფლიკი აღფრთოვანებული იყო კლუბის მიერ გამოცხადებული ნდობით და აღნიშნა, რომ მისი მიზანია უფრო მეტი ტიტულის მოგება. გერმანელმა მწვრთნელმა ხაზი გაუსვა “ბარსელონას” სპორტული პროექტის სტაბილურობას და თავის კარგ ურთიერთობას დეკუსთან და მის გუნდთან. გულშემატკივრების შესახებ მან თქვა, რომ “ჩვენთან შესანიშნავი ატმოსფეროა“, რის შემდეგაც დასძინა: “მომავალ სეზონში ყველაფერს გავიღებთ, რათა ავიხდინოთ ის ოცნებები, რომლებიც გვაქვს”.

ჰანსი ფლიკი, გამარჯვებული “ბარსელონას” არქიტექტორი

თუ პირველ სეზონში ჰანსი ფლიკმა “ბარსელონას” ქომაგებს იმედი დაუბრუნა, მეორე სეზონში მან დაადასტურა, რომ ეს აღფრთოვანება რეალობაზე იყო დაფუძნებული. გერმანელმა სპეციალისტმა შექმნა კონკურენტუნარიანი გუნდი, რომელიც ერთგულია კლუბის იდენტობის, შეუძლია შიდა ასპარეზზე დომინირება და ევროპულ ელიტაში კუთვნილი ადგილის დაბრუნება. კონტრაქტის გახანგრძლივებით “ბარსელონა” უზრუნველყოფს მწვრთნელისა და ამ პროექტის უწყვეტობას.

შედეგები ჰანსი ფლიკის ხელწერაზე მეტყველებს. “ბარსელონას” მწვრთნელის რანგში გატარებულ ორ სეზონში მან შესაძლო რვიდან ხუთი ტიტული მოიგო: ორი ლა ლიგა, ორი ესპანეთის სუპერ თასი და კოპა დელ რეი. ეს არის შთამბეჭდავი მიღწევების სია, რომელსაც ახლახან დაემატა ზედიზედ მეორე ჩემპიონობა, რაც “ელ კლასიკოში” “რეალ მადრიდთან” მოპოვებული გამარჯვებით გაფორმდა და ამ მხრივ ისტორიაში შევიდა.

ფლიკის გავლენა მხოლოდ შედეგებში არ გამოიხატება, მწვრთნელმა ნდობა გამოუცხადა “ბარსელონას” ადგილობრივ ნიჭიერ ფეხბურთელებსაც. “ლა მასიას” 13 მოთამაშის დებიუტი შედგა გერმანელის ხელმძღვანელობით. ფეხბურთელთა მთელმა თაობამ ფლიკის სახით იპოვა მწვრთნელი, რომელიც მზად არის მისცეს მათ შანსი და მაქსიმალურად გამოავლინოს მათი პოტენციალი.

ახალგაზრდობისა და გამოცდილების სინთეზი “ბარსელონას” წარმატების ერთ-ერთი მთავარი გასაღები გახდა. იმ შემადგენლობით, რომელიც სავსეა ამომავალი ვარსკვლავებით და გამოირჩევა ნაცნობი, შემტევი სტილით, ფლიკმა შეძლო შეექმნა გუნდი, რომელსაც შეუძლია, კონკურენცია გაწიოს ნებისმიერ დონეზე. “ბარსელონაში” გატარებულ სულ რაღაც ორ სეზონში ფლიკმა უკვე ჩაწერა თავისი სახელი კლუბის ისტორიაში ტიტულებით, რეკორდებითა და მომავლის ხედვით.