ჰანსი ფლიკი რაიოსთან თამაშის შემდეგ

ლა ლიგის მე-3 ტურში “სპოტიფაი კამპ ნოუზე” “რაიო ვალეკანოს” 5-2 განადგურების შემდეგ, “ბარსელონა” სატურნირო ცხრილის სათავეში რჩება. მატჩის შემდგომ პრესკონფერენციაზე ჰანსი ფლიკმა კმაყოფილება გამოთქვა, თუმცა თამაშის გარკვეულ ასპექტებში გაუმჯობესების აუცილებლობაზეც გაამახვილა ყურადღება.

“სეზონის კარგი სტარტი გამოგვივიდა – ზუსტად ისეთი, როგორიც გვსურდა. მეტოქემ კარგად ითამაშა და პრესინგს მიმართა, მაგრამ გაშვებული გოლის შემდეგ ჩვენი რეაქცია ძალიან კარგი იყო. ჩემთვის მთავარი სამი ქულაა. პირველი ტაიმი შესანიშნავად ჩავატარეთ. მეორე ნახევარში მეტოქე ძალიან კარგი იყო და ცოტა გაგვიჭირდა, თუმცა მათ გოლებზე ჩვენი პასუხი უმაღლესი დონის აღმოჩნდა. ხუთი გოლის გატანა ფანტასტიკურია.”

ქათინაურები შემტევ ტრიოს: რაფინია, იამალი და გორდონი

ფლიკმა განსაკუთრებით გამოარჩია შემტევი სამეული, რომელთა ანგარიშზეც ოთხი გოლი და საგოლე გადაცემები იყო:

“რაფინიასგან ზუსტად ამ დონეს ველოდი. ის ფანტასტიკური ფეხბურთელია და გუნდს ზუსტად იმას აძლევს, რაც გვჭირდება.

რაც შეეხება ლამინ იამალს, ვფიქრობ, მას მუდმივად გაუმჯობესება სურს. მისით და მისი თამაშით ძალიან ბედნიერი ვარ. გასაოცარია იმის ყურება, თუ რამდენად ძლიერია – ჩემთვის ის დაუჯერებელ დონეზე იმყოფება.

ენტონი გორდონი ბურთით გადამწყვეტი მოთამაშეა, ძალიან სწრაფია და ბურთთან ურთიერთობისას გადაწყვეტილებებს მკაფიოდ იღებს. დღეს მან ორი საგოლე პასი გააკეთა – ჩვენთვის გასაოცარია მისი ყოლა. მასთან, კარიმთან (ადეიემი) და რაფასთან ერთად შეტევაში უდიდესი სისწრაფე გვაქვს, სისწრაფე კი ყოველთვის კარგია.”

როდრის მდგომარეობა და თამაშის კონტროლი

გერმანელმა სპეციალისტმა აღნიშნა, რომ ანგარიშის მიუხედავად, გუნდს ბურთის გაკონტროლება კიდევ უფრო უკეთ მართებს:

“რთული მეტოქე გვყავდა. ჯერ წინ ბევრი მატჩია და მაშინაც კი, როცა 3-1-ს ვიგებთ, თამაშის კონტროლი უნდა ვისწავლოთ. გვაქვს ხარისხი, რომ ბურთი უკეთ ვაკონტროლოთ. კარგია, რომ გოლის გატანა სურთ, მაგრამ თამაში უნდა ვმართოთ. ბურთით ენერგიის აღდგენა ყოველთვის უფრო მარტივია, ვიდრე უბურთოდ – ბურთი უნდა ვამოძრაოთ.

რაც შეეხება როდრის, მას ფიზიკური კონდიციების გაუმჯობესება სჭირდება, რადგან გუნდთან ერთად მხოლოდ ორი დღეა, რაც ვარჯიშობს.”

გაბრიელ ჟეზუსის ტრანსფერი და მადლობა დეკუს

ფლიკმა ლონდონის “არსენალიდან” გაბრიელ ჟეზუსის მოულოდნელ ტრანსფერზეც ისაუბრა:

“მას ნაშუადღევს ვესაუბრე. სიმართლე გითხრათ, ცოტათი მეც გაკვირვებული ვიყავი იმით, რომ მისი დამატების შესაძლებლობა მოგვეცა. გაბრიელ ჟეზუსი შესანიშნავი თავდამსხმელია და ძალიან მიხარია, რომ აქ არის. ვფიქრობ, ის ძალიან დაგვეხმარება. ეს ჩვენთვის მნიშვნელოვანი ტრანსფერია და მადლობა დეკუს, რომელმაც ჩვენთვის ფანტასტიკური სამუშაო შეასრულა.”