ჩავი ერნანდესი კადისთან მატჩის წინ

ხვალინდელი დღე უმნიშვნელოვანესია და, ვიმედოვნებ, გულშემატკივრები მხარს დაგვიჭერენ. ხუთშაბათს მომხდარი შემთხვევა აღარ უნდა განმეორდეს. 

აშკარაა, რომ ის, რაც “აინტრახტთან” მოხდა, კლუბის შეცდომაა. ამან მოთამაშეებზე გავლენა მოახდინა. მატჩის შემდეგ ფეხბურთელებმა მითხრეს, რომ თავს კომფორტულად არ გრძნობდნენ. 

ხვალინდელი მატჩი რთული იქნება – “კადისი” სახიფათო მეტოქეა: მათ ახალი მწვრთნელის ხელში საგრძნობლად მოუმატეს.

თამაშის მოდელის შეცვლის პროცესში ვართ.

ზოგადად, ბურთს ბევრჯერ ვკარგავთ. უნდა გვჯეროდეს იმის, რასაც ვაკეთებთ. ბოლო პერიოდში ფორმიდან ამოვვარდით.

პიკეს ტრავმა არ აქვს, მას მხოლოდ დისკომფორტი აწუხებს. ხვალ ჟერარი ჩვენთან არ იქნება, ხუთშაბათს – ვნახოთ. 

პედრი დამწუხრებულია. ის სეზონის საუკეთესო პერიოდს ატარებდა. ეს დაზიანება გონსალესსა და კლუბს ძალიან ვნებს. ვნახოთ, როდის მოახერხებს გამოჯანმრთელებას. 

დიახ, დღეს “სევილიას” თვალს მივადევნებთ, თუმცა, საკუთარ თამაშზე ვართ კონცენტრირებულნი.

შეცდომებისგან უნდა ვისწავლოთ. 5 წელია, ევროასპარეზზე კარგად არ გამოვიყურებით. ჩვენი პროექტი ნოემბერში დაიწყო, დრო გვჭირდება.

ისე თამაში გვმართებს, როგორც “ბერნაბეუზე” და ნეაპოლში ვაჩვენეთ. რამდენიმე მატჩი ძალიან კარგად ჩავატარეთ და ასე უნდა გავაგრძელოთ.

ჩემპიონთა ლიგაზე გასვლისთვის ბრძოლა გრძელდება. მოთმინება და კარგად მუშაობა გვჭირდება. წინ 8 ფინალია დარჩენილი. 

“აინტრახტთან” დაფიქსირებულ ფაქტზე არ გვისაუბრია. გამოძიება მიმდინარეობს და, ვიმედოვნებ, საჭირო ზომებს მიიღებენ, რათა მსგავსი რამ აღარ მოხდეს. 

ვფიქრობ, “ლევანტესა” და “აინტრახტის” წინააღმდეგ კარგად ვითამაშეთ, მაგრამ, გადმოვარდნილი ბურთებით ვერ ვსარგებლობდით. “რეალთან” და “სევილიასთან” მაღალი დონის მატჩი ჩავატარეთ, ახლა კი ფორმა დავკარგეთ, მაგრამ, მისი აღდგენა მხოლოდ დროის საკითხია. 

საკუთარ ძლიერ და სუსტ წერტილებზე ვისაუბრეთ. მჯერა, რომ სწორ გზას ვადგავართ და კარგი შედეგები მოვა. 

ვხედავ, რომ გუნდს დარჩენილი 8 შეხვედრის მოგების შესაძლებლობა აქვს… მაგრამ, ეს ძალიან რთული იქნება, დაწყებული “კადისით”, რომელიც ლა ლიგაში გადარჩენისთვის იბრძვის, და გაგრძელებული “რეალ სოსიედადით”, რომელიც ევროტურნირებზე მოხვედრას ლამობს.

მიუხედავად იმისა, რომ ეს ძალიან რთული იქნება, ჩემპიონობისთვის ბრძოლა შეგვიძლია. ფეხბურთელებს ვუთხარი, რომ უნდა ამაყობდნენ იმით, რასაც აკეთებენ. ასევე, გუნდს ავუხსენი, რა ასპექტებში უნდა გავუმჯობესდეთ.

“აინტრახტთან” მატჩში ბურთს ვაკონტროლებდით, მაგრამ, ამით ვერ ვისარგებლეთ, რაც არ უნდა მომხდარიყო. 

მნიშვნელოვანია, ანგარიში გავხსნათ, რადგან ეს მეტოქეს წინ აწევას აიძულებს. თუ პირველ გოლს მეტოქე იტანს, თავს დიდი ძალებით იცავს და ყველაფერი რთულდება. ამიტომ, შეხვედრის სტარტზე კარგი მოქმედებები გვმართებს. 

რა მოხდება, თუ დღეს “რეალი” წააგებს? სანამ მოწინააღმდეგეების შედეგებს ვნახავთ, ჩვენი მატჩი უნდა მოვიგოთ. 

ინტენსიური კვირაა, რის გამოც, წაგებული მატჩები მალე უნდა დავივიწყოთ.

ახლა მხარდაჭერა ისე გვჭირდება, როგორც არასდროს. ერთგული ფანები ჩვენთან უნდა იყვნენ. კარს უკან მყოფი გულშემატკივრები განსაკუთრებულნი არიან – ჩემი ფეხბურთელობის შემდეგ ეს ძალიან შეიცვალა. საოცარია, თუ როგორ გვეხმარებიან ისინი.

ლანგლესი მჯერა, ისევე, როგორც სხვების, რადგან ვარჯიშებზე ყველა მაქსიმალურად იხარჯება. 

45 მატჩში 55 გოლი გავუშვით? პროგრესი გვმართებს. მაღალი დაცვის ხაზით უნდა ვითამაშოთ. ადრე, გოლებს იმიტომ ვუშვებდით, რომ ბურთს ცუდ ადგილებში ვკარგავდით.

ფიზიკურ კომპონენტში პრობლემას ვერ ვხედავ. უფრო ჭკვიანური მოქმედები გვჭირდება. მეტად კონკურენტუნარიანები უნდა ვიყოთ. ბურთი სწრაფად უნდა დავიბრუნოთ ან, კონტრშეტევების თავიდან ასარიდებლად, დავჯარიმდეთ.

“აინტრახტთან” მატჩამდე, სასტუმროში ცუდი გრძნობები მქონდა. ხალხი სხვადასხვა საგნებს გვესროდა, შემდეგ კი სტადიონზე შესვლა სხვა შესასვლელიდან მოგვიხდა. ამასთან, მეტოქემ მალევე გაგვიტანა.

ბოლო მატჩებში გულშემატკივრები მხარს გვიჭერდნენ და გაშვებული გოლის მერეც გვამხნევებდნენ. ფრანკფურტელთა წინააღმდეგ ასე არ მოხდა.

ამ სტილით ჩემპიონთა ლიგა 5-ჯერ მოვიგეთ. “ბარსას” DNA ასეთია და ამ გზას არ უნდა გადავუხვიოთ. ბოლო წლებში საკუთარი ფილოსოფია დავკარგეთ, ახლა კი ის უნდა დავიბრუნოთ. 

თვითკრიტიკულნი უნდა ვიყოთ: “აინტრახტთან” კარგად არ შეგვიტევია და ეფექტურები არ ვიყავით.