ტრანსფერი გადაწყდა! – ბარსელონა დომინიკ ლივაკოვიჩს იმატებს

ფაბრიციო რომანოს ინფორმაციით, ბარსელონამ ფენერბაჰჩედან დომინიკ ლივაკოვიჩის ტრანსფერი შეათანხმა.

კატალონიური გრანდი თურქულ კლუბს ხორვატის მეკარის სანაცვლოდ €2 მილიონს გადაუხდის, რასაც, ბონუსების სახით, შესაძლოა, €2 მილიონიც დაემატოს.

ბარსა დომინიკს ერთწლიანი იჯარით გაუშვებს და 2027 წელს დაიბრუნებს, როცა ვოიცეხ შჩესნის კონტრაქტი ემოეწურება და გუნდს დატოვებს. ამჟამად მეორე მეკარის სტატუსი სწორედ პოლონელს აქვს, მომავალი წლიდან კი ჟოან გარსიას დუბლიორი ლივაკოვიჩი იქნება.

31 წლის გოლკიპერმა კარიერა ზაგრებში დაიწყო, შემდეგ კი დინამო ზაგრებში გადავიდა, სადაც 2016-2023 წლებში ასპარეზობდა. ფენერბაჰჩემ დომინიკი 2023 წელს შეიძინა. აღსანიშნავია, რომ მან თურქული კლუბიდან იჯარით 1 სეზონი ესპანურ ჟირონაში გაატარა.