ფერმინი: უმაღლეს დონეზე ვართ, მაგრამ მოდუნების უფლება არ გვაქვს

სტამბოლში “გალათასარაისთან” გამარჯვებისას ფერმინ ლოპესმა ლამინ იამალის ულამაზესი გადაცემით თავური დარტყმით ანგარიში 1-2 გახადა და “ბარსელონა” წინ გაიყვანა. შეხვედრის დასრულების შემდეგ ესპანელმა შემტევმა იამალთან არსებულ განსაკუთრებულ კავშირზე ისაუბრა:

“ლამინი ჩემი მეგობარი და შესანიშნავი თანაგუნდელია. როდესაც ბურთი მას აქვს, მუდმივად ვცდილობ თავისუფალ ზონაში გავეხსნა, რადგან ის მხედავს და ჩემს მოძებნას ცდილობს. ის მსოფლიოში საუკეთესოა და უდიდესი ოსტატობა აქვს. მოედნის მიღმა შესანიშნავი ურთიერთობა გვაქვს და ეს მოედანზეც გადადის.

ჩემი გოლის ნახევარს ლამინ იამალს მივცემდი – ეს მისგან ნამდვილი საჩუქარი იყო! თუმცა პირადად ჩემთვის გოლების გატანა დაუჯერებელი გრძნობაა. ‘ბარსელონას’ მაისურით თავის გამოჩენა მუდამ განსაკუთრებულია”.

სეზონი გრძელია – მოდუნების დრო არ არის

ფერმინმა გუნდის მიმდინარე ბრწყინვალე ფორმა შეაფასა, თუმცა თანაგუნდელებს სიფხიზლისკენ მოუწოდა:

“უმაღლეს დონეზე ვართ, თუმცა ჯერჯერობით ეს არაფერს ნიშნავს, რადგან სეზონი ძალიან გრძელია. შესანიშნავ დინამიკაში ვართ და ბევრს ვშრომობთ, მაგრამ მოდუნება არ შეიძლება, ასე უნდა გავაგრძელოთ.

ვიცით, რომ წინ ურთულესი კვირა გველის. ძალიან ძლიერ მეტოქეებთან მოგვიწევს თამაში, თუმცა მზად ვართ და მიმდინარე თვეში დარჩენილი ყველა შეხვედრის მოგებას შევეცდებით. ეს მხოლოდ სეზონის დასაწყისია და ვიცით, რომ გარკვეულ მომენტში შესაძლოა ჩავარდნაც გვქონდეს. ამ ეტაპზე ჩვენი კარგი ფორმით უნდა ვისიამოვნოთ და ეს ტემპი შევინარჩუნოთ”.

თამაშის სადავეების დაბრუნება

სტამბოლური შეხვედრის რთულ მონაკვეთზე ფერმინმა დასძინა:

“ჩვენი დომინაციის მიუხედავად, მათი გატანილი გოლის შემდეგ თამაში უცნაური გახდა. თუმცა ამის შემდეგ შევძელით ვითარების შემოტრიალება და მატჩის სადავეების სწორად მართვა”.