ფლიკის სია – რას გადაწყვეტს გერმანელი

   2025/26 წლების სეზონი “ბარსასთვის” კვირას დაიწყება. ფლიკმა ფეხბურთელები 13 ივლისს დაიბარა სამედიცინო შემოწმებაზე, ერთთვიანი დასვენების შემდეგ. აბსოლუტურად ყველა ფეხბურთელს პირველივე დღიდან ელიან, რადგან “ბარსა” მსოფლიოს საკლუბო ტურნირში ჩართული არ ყოფილა და არც სანაკრებო თამაშები ჩატარებულა. 

ვარჯიშები ორშაბათს დაიწყება, მერე “ბარსა” აზიურ ტურნეში წავა, ჯერ იაპონიში ითამაშებს “ვისელ კობესთან”, მერე კი კორეაში – “სეულთან” და “დაგუსთან”. ამ დროისთვის მხოლოდ ერთი ტრანსფერია დასრულებული, “ბარსას” რიგებს ჟოან გარსია შეემატა, ნიკო უილიამსმა “ბილბაოში” დარჩენა გადაწყვიტა. თუმცა, ფანჯრის დახურვამდე დიდი დროა და ახალ ფეხბურთელებსაც ელიან. მანამდე კი ჰანსი ფლიკს რამდენიმე საკითხი აქვს გადასაწყვეტი. 

ტერ შტეგენის საკითხი 

“ბარსას” შტეგენის გაშვება სურს, რადგან გერმანელს მაღალი ხელფასი აქვს, მისი შეცვლა კი შესაძლებელია, ამაში გასულ სეზონშიც დარწმუნდნენ, შესაბამისად, ამხელა თანხის გადახდა კრიზისის დროს ლაპორტას მიზანშეწონილად არ მიაჩნია. მეორე მხრივ, შტეგენს კონტრაქტის ბოლომდე, ესე იგი, 2028 წლამდე სურს დარჩენა. შიდა წყაროს ცნობით ფლიკი შტეგენთან საუბარს ორშაბათს აპირებს, იწერება, რომ ჰანსი აპირებს შტეგენს გაუმხილოს, რომ მომავალ სეზონში პირველ ნომრად მას ვერ ხედავს, რაც ბიძგი იქნება კლუბი დატოვოს, კონტრაქტი შტეგენის მხარეს არის, მაგრამ კლუბს იმედი აქვს, რომ შტეგენზე მსოფლიო ჩემპიონატი იქონიებს გავლენას, ნოიერის ნაკრებიდან წასვლის მერე შტეგენს დიდ სანაკრებო ტურნირზე თამაშის შანსი გაუჩნდა, ამისათვის მუდმივი სათამაშო პრაქტიკა სჭირდება, “ბარსელონაში” იმედოვნებენ, რომ მუნდიალი გადამწყვეტ როლს ითამაშებს. 

კარგი მეკარე კიდევ ბევრს სჭირდება. დიდ თანხას ინგლისელები ყველა შემთხვევაში გადაიხდიან. თუმცა, “ბარსელონა” იმაზეც კი არის თანახმა რომ შტეგენი რაც შეიძლება დაბალ ფასად გაუშვას კლუბიდან. ამაზე უარს არავინ იტყვის. 

“ბარსა” შესნის კიდევ ორი წლით დაიტოვებს, კლუბი კმაყოფილია მისი თამაშით და იმ გავლენით რაც პოლონელს გასახდელში აქვს, დიდი გამოცდილების მქონე ფეხბურთელია, კლუბს კი სწორედ ასეთი სჭირდება მეორე ნომრად. არის მეოთხე მეკარეც – ინიაკი პენია. უკვე დიდი ხანია ელიან, რომ კლუბს დატოვებს, მაგრამ ჯერ ისევ აქ არის, 26 წლის ასაკში წესით თამაში უნდა სურდეს, ახლა კი მეოთხე ნომერია და წასვლასაც არ ჩქარობს. კონტრაქტი 2026 წლამდე აკავშირებს. როგორც ამბობენ პენია შესაფერის ვარიანტს ელის. 

თუ კლუბი პენიამ და შტეგენმა დატოვეს, აკადემიიდან დააწინაურებენ 19 წლის დიეგო კოხენს, რომელსაც დიდ მომავალს უწინასწარმეტყველებენ. 

რაშფორდი და დიაში 

ზაფხულის დასაწყისში ფლიკი და დეკუ შეთანხმდნენ, რომ კლუბს მარცხენა გარემარბი სჭირდება. ნიკო კარგი ვარიანტი იყო, მაგრამ ხელიდან გამოეცალათ, ბევრი ფეხბურთელი აღარც არის დარჩენილი, რომელსაც დიდი სარგებლის მოტანა შეუძლია, ახლა მხოლოდ ორ კანდიდატზე ბჭობენ – რაშფორდი და დიაში. დეკუსთვის პრიორიტეტი დიაშია, მაგრამ “ლივერპულისგან” უარია და დიეგუ ჟოტას ტრაგედიის მერე რთულად სავარაუდოა, რომ კიდევ ერთ შემტევს შეელიონ. (მიუხედავად პოზიციური სხვაობისა) 

მეორე კანდიდატი რაშფორდია, ერთ დროს ვარსკვლავბიჭუნა, რომელმაც ვერ გაამართლა. თუმცა, პოსტ-ფერგიუსონის “მანჩესტერში” არც არავის გაუმართლებია. რაშფორდი არასტაბილურია, ტრავმებისკენ მიდრეკილი, თუმცა, “ასტონ ვილაში” მეორე სუნთქვა გაეხსნა და მშვენიერი სეზონიც ჩაატარა, მათ შორის, ჩემპიონთა ლიგაზეც. წესით, უნდა გამოადგეს “ბარსას”. თუ უილიამსის შემთხვევაში ვიტყოდით, რომ 100%-ით ძირითადში იქნებოდა და რაფინია ცენტრში გადაინაცვლებდა, რაშფორდის შემთხვევაში შეგვიძლია ვთქვათ, რომ უბრალოდ კონკურენციაში ჩაებმება. 

სავარაუდოდ ეს საკითხი ზაფხულის ბოლომდე გასტანს. 

ვინ რჩება, ვინ მიდის 

არაუხოს ნდობა გამოუცხადეს, კიდევ ერთხელ. შეგახსენებთ, რომ სეზონის წინ მისი გაყიდვა სურდათ, მაგრამ ფლიკი რაფინიამ გადაარწმუნა, არაუხო ჩვენთვის ძალიან მნიშვნელოვანი ფიგურააო, დარჩა ურუგვაელი, თუმცა, ყველაზე ცუდი სეზონი ჰქონდა “ბარსელონაში”, ახლა კი ისევ ნდობა გამოუცხადეს, კლუბში სჯერათ, რომ ფორმას დაიბრუნებს. არაუხო დათქმულ დროზე ოთხი დღით ადრე დაბრუნდა მოსამზადებლად. 

აი, კრისტენსენის დატოვება აღარ სურთ, მაგრამ დანიელს მოსწონს ბარსელონაში ცხოვრება და წასვლას არ აპირებს. მხოლოდ ერთი წელი დარჩა კონტრაქტით, დაცვაში კონკურენცია ისედაც დიდია, “ბარსას” ადგილის გამოთავისუფლება სურს. კუბარსი და ინიგო ხელშეუხებლები არიან. “ბარსას” ჰყავს ასევე ერიკ გარსია, რომელიც ფლიკს მოსწონს მისი უნივერსალიზმის გამო, არაუხოს ტოვებენ და.. თითქოს კრისტენსენის ადგილი აღარ არის. 

ფერმინ ლოპესის გვარმა გაიჟღერა გერმანიაში, ჯამალ მუსიალას შემცვლელად, ფეხი მოიტეხა უნიჭიერესმა ფეხბურთელმა და ფერმინი თითქოს მის შემცვლელად სურდათ, მაგრამ ფლიკმა პირადად თხოვა დარჩენა. როგორც ჩანს, მასთან მიმართებით გეგმები აქვს. 

ელიან პაუ ვიქტორის წასვლას, რადგან სათანადო დროს ვერ იღებს და კიდევ ერთი შემტევის მოსვლის მერე მით უმეტეს ვერ მიიღებს. მან ლევანდოვსკის შემცვლელად ადგილი ფერან ტორესთან დათმო, თავის მხრივ, ტორესი უკვე ძირითადისთვის იბრძოლებს და ექნება იმედი, რომ მობერებულ ლევანდოვსკის აჯობებს, რომელიც კონტრაქტით გათვალისწინებულ ბოლო წელს დაიწყებს “ბარსელონაში”. 

მოულოდნელი ხმა გავრცელდა კასადოს შესახებ, კლუბში მიაჩნიათ, რომ მისი გაყიდვისთვის კარგი დროა, რაც გაუგონარი ამბავია, რადგან საქმე ეხება ძალიან ახალგაზრდა, უნიჭიერეს ფეხბურთელს. მან ძირითადში ადგილი დე იონგთან ბრძოლაში დაკარგა, შესანიშნავი სეზონი ჩაატარა და ბოლოს მძიმე ტრავმაც მიიღო. ახლა “ბარსას” სამი გამორჩეული ფეხბურთელი ჰყავს საყრდენზე – ფრენკი დე იონგი, მარკ კასადო, და მარკ ბერნალი, რომელიც მომავალი ბუსკეტსია, თუმცა, რა ფორმაში დაბრუნდება იოგების ტრავმის მერე კაცმა არ იცის. საჭიროა სამი საყრდენი? არა, მაგრამ კასადოს გაყიდვა მაინც სიგიჟე მგონია. ამას ემატება ერიკ გარსია, რომელსაც ფლიკი ხშირად იყენებდა საყრდენ ნახევარმცველად. 

თავად კასადოს დარჩენა სურს. 

კიდევ მოდის შევსება? 

სიგიჟეა! ყოველ წელს ახალ ვარსკვლავს ვეცნობით, ბოლოს კასადო და ბერნალი გამოჩდნენ, მანამდე კუბარსი და იამალი, მანამდე გავი და ბალდე, არა და არ მთავრდება და ამას რა სჯობია?! 

ლა მასიადან დაწინაურებას უპირებენ ჟოფრე ტორენტსს, რომელიც მარცხენა მცველია და კარგი პრესა აქვს, ამბობენ, რომ ძალიან ტექნიკურია და ამავე დროს ფიზიკურად ძლიერი, შეუძლია ჟერარ მარტინთან კონკურენციაში ვიხილოთ, ბალდეს შემცვლელის როლისთვის. 

ტონი ფერნანდესი ფლიკის ფავორიტი ახალგაზრდა ფეხბურთელია, რომელსაც კოპა დელ რეიზე მისცა კიდეც სათამაშო დრო. ტონი შემტევია და ყველა პოზიციაზე შეუძლია თავდასხმაში თამაში. ასევე, ყურადღების ქვეშ არის ჟული ფერნანდესი, ტონის ძმა, რომელიც ამჯამად 19-წლამდელთა გუნდშია. 

ასევე, ვარჯიშზე ელიან ქუიმ ჟინიენსა და იან ვირჯილს. მოკლედ, ახალ სახეებს კვლავ უნდა ველოდოთ.