რა ვიცით იამალის კონტრაქტზე

  ხშირად არ ხდება ფეხბურთელი კონტრაქტს აწერდეს ხელს და ისეთი შეგრძნება გრჩებოდეს თითქოს კლუბმა ტიტული მოიგო. ლამინე იამალი “ბარსელონაში” 2031 წლამდე დარჩება. კონტრაქტი ძალაში ლამინეს დაბადების დღეზე შევა, როცა ესპანელი 18 წლისა შესრულდება და ავტომატურად გახდება მეორე ყველაზე მაღალანაზღაურებადი ფეხბურთელი “ბარსელონაში”.  

თუ ლამინე ყველა იმ შედეგს დადებს, რაზეც კონტრაქტში ბონუსებია გათავლისწინებული, მაშინ მისი საერთო შემოსავალი წელიწადში 40 მილიონ ევროს მიაღწევს, რაც კლუბში საუკეთესო მაჩენებელი იქნება, მაგრამ ამ თანხის 50% გადასახადებში წავა. ახალი კონტრაქტის გაფორმება რთული არ ყოფილა, იამალს დარჩენა სურდა, “ბარსას” მისი დატოვება, ყველაფერი მარტივია. წინა კონტრაქტს 2023 წელს მოაწერა ხელი, როცა 16 წლის იყო, ის გახდა ყველაზე ახალგაზრდა ფეხბურთელი, რომელმაც ლა ლიგის მატჩი ძირითად შემადგენლობაში დაიწყო. დებიუტი 15 წლის ასაკში ჰქონდა, 16 წლის ასაკში კი ესპანეთის ნაკრებშიც მოხსნა რეკორდები. 

ახალი კონტრაქტის მზადება ჯერ კიდევ წინა ზაფხულს დაიწყო, როცა იამალმა ევროპის ჩემპიონატი მოიგო და საუკეთესო ახალგაზრდა ფეხბურთელი გახდა. კონტრაქტს ჟორჟე მენდეში კურირებს, ერთ-ერთი საუკეთესო აგენტი მსოფლიოში, ჟორჟეს ჟოან ლაპორტასთან ყოველთვის კარგი ურთიერთობა ჰქონდა. მენდეში ასევე წარმოადგენს ბალდესა და ანსუ ფატის. ისეთი შთაბეჭდილება შეიქმნა, რომ “ბარსა” ვალში იყო ჟორჟე მენდეშთან, რომელმაც მისი ორი კლიენტი (კანსელუ და ფელიქსი) “ბარსელონას” დაუკავშირა, მერე კი შეთანხმება ბოლომდე ვერ შესრულდა, “ბარსას” კანსელუ უნდა გამოესყიდა, მაგრამ ფული აღარ ჰქონდა, ამიტომ, ჯენტლმენური შეთანხმება დადეს, რომ მომავალში ეცდებოდნენ მის გაფორმებას. კანსელუს ჩივილიც შეეძლო, მაგრამ ყველაფერს ისევ მენდეშისა და ლაპორტას ურთიერთობამ უშველა. 

შიდა წყაროები ამბობენ რომ კონტრაქტის დეტალები ჯერ ცნობილი არ არის, მაგრამ ლამინეს “ლა მასიელის” სტატუსი დაეხმარება საგადასახადო რეგულაციებს ნაწილობრივ მაინც გვერდი აუაროს. 

დეკუმ RAC1-თან ისაუბრა ტრანსფერებზე და ქომაგსაც გარკვეული წარმოდგენა შეექმნა: 

“სხვა ფეხბურთელებზე ბევრს ვერ ვისაუბრებთ, ჩვენთვის ის უფრო მნიშვნელოვანია, რომ არსებული კონტიგენტი განვითარდეს. ჩვენი ამოცანაა ბირთვი თავს მშვიდად გრძნობდეს და ერთობლივად განაგრძონ გზა. ზაფხულში საუკეთესო ტრანსფერი რა იქნება? ლამინეს ახალი კონტრაქტი, მსურს მან “ბარსასთან” ერთად ოქროს ბურთი მოიგოს”. 

“პირადად ფეხბურთელებთან დეტალებზე არ ვსაუბრობთ, ამისთვის მათ აგენტები და ოჯახის წევრები ჰყავთ, მით უმეტეს, მაშინ, როცა ფეხბურთელი ჯერ სრულწლოვანი არ არის”. 

იამალის გარემოცვას მიაჩნია, რომ ლამინეს ყველაზე დიდი გავლენა აქვს ჰანსი ფლიკის “ბარსელონაზე” და ის მზად არის გახდეს კლუბის ყველაზე მაღალანაზღაურებადი ფეხბურთელი. იამალი არა მხოლოდ საფეხბურთო მონაცემებით გამოირჩევა, არამედ, ძლიერი მენტალობით, ასაკისათვის შეუფერებელი გამბედაობით, პრესკონფერენციებზე მისი ინტერვიუები ყოველთვის საინტერესოა – “წნეხი? რა წნეხი? ყველანაერი შიში უბანში დავტოვე, მატაროს ქუჩებში”. 

“სანამ ვიმარჯვებ “ჰეითერებს” არაფრის თქმა არ შეუძლიათ”. 

ამჟამად “ბარსას” ყველაზე მაღალანაზღაურებადი ფეხბურთელი 37 წლის რობერტ ლევანდოვსკია, ბოლო წელს 36 მილიონი ევრო გამოიმუშავა. იამალის შემოსავალმა 2024/25 წლების სეზონში 3 მილიონი ევრო იყო. ახლა საკითხავია შემოსავლის ასეთი ზრდა რა გავლენას მოახდენს 17 წლის ბიჭზე, სულ მალე 18 წლისა შესრულდება და დასახარჯიც ბევრი ექნება. მეორე მხრივ, შეუძლებელია ასეთ ფეხბურთელს ხელფასი არ მოუმატო, რადგან მსურველი უამრავი ეყოლება და მცირე ხნის წინ გავრცელდა კიდეც ცნობა პსჟ-ის აქტიურობის შესახებ. 

იამალს კლუბისთვისაც მოაქვს შემოსავალი, მის ხელში ჩასაგდებად ნაიკი და ადიდასი იბრძოდნენ, საბოლოოდ, გამარჯვება ადიდასს დარჩა, ბრენდის მენეჯერებმა იამალზე გავლენის მოსახდენად ლიონელ მესი გამოიყენეს. “ასაკს მნიშვნელობა არ აქვს, ის განსაკუთღებული შემთხვევაა და განსაკუთღებული მოფრთხილება სჭირდება”, – ამბობს ჟოან ლაპორტა TV3-თან ინტერვიუში.