მატჩისშემდგომი მიმოხილვა: ცალი ფეხით – ჰოპ!

   სამი ბურთი გაფლანგულა, ოთხი არა, არასდროს! ჩემპიონთა ლიგაზე მხოლოდ ერთი კლუბია, რომელსაც ოთხბურთიანი ბარიერი დაუძლევია და ეს “ბარსელონაა”! ასე რომ, 99%-ით “ბარსა” ნახევარფინალშია. იმ ერთ პროცენტში სასწაულები ხდება ხოლმე, მაგრამ ახლა მაგის დრო არ არის და არც “დორტმუნდია” სასწაულის მომხდენი. “ბარსა” ფავორიტი იყო და რაღაც მსგავს სცენარს ელოდნენ კიდეც, ჰანსი ფლიკი რამდენჯერაც გასულა “დორტმუნდის” წინააღმდეგ იმდენჯერ მოუგია, რობერტ ლევანდოვსკის კიდევ კარიერაში ყველაზე მეტი გოლი სწორედ ყოფილი კლუბის წინააღმდეგ აქვს შეგდებული. უკვე ჩვეულებრივად აღნიშნავს ამ გოლებს, აბა, წარმოიდგინეთ რა სასაცილო იქნებოდა 28-ჯერ რომ გოლი არ აღენიშნა. 

ამ მატჩამდე 27-27 გოლი ჰქონდა “ბორუსიასა” და “ვოლსბურგის” კარში შეგდებული, ახლა კი “დორტმუნდი” დაწინაურდა. სამივე ფორვარდმა გაიტანა, ნელ-ნელა ეწერება ეს სამეული ლეგენდარული სამეულების სიაში, სათავეში ალბათ ვერასდროს ვერ მოხვდება, მაგრამ სამივე შემტევი რომ ბრწყინავს უკვე საქმეა. 

მეტად უცნაური გოლები 

ლამაზი იყო, მაგრამ უცნაური, თანაც, ორჯერ. რაფინიამ და ლევანდოვსკიმ კარის ხაზიდან შეაგდეს გოლები. განსხვავება მაინც იყო, რაფინია რომ ბურთს არ შეხებოდა მაინც გავიდოდა გოლი და კუბარსი იქნებოდა მისი ავტორი, ბრაზილიელმა კი გარისკა და შეეხო, გარისკა, რადგან თამაშგარეს ზღვარზე იყო, საბოლოოდ კი გაუმართლა და გოლი ჩაითვალა. ცენტრალური მცველების მონაწილეობით გავიდა ეს გოლი, მატჩის მიწურულს არაუხო გამოვიდა, გოლისგანაც იხსნა გუნდი, ფლიკი მაინც კუბარსისა და ინიგოს მიიჩნევს ძირითადის წევრებად. 

მეორე გოლი უფრო ლამაზი გამოვიდა, იდეალური კომბინაცია გათამაშდა, თავდაპირველად მომეჩვენა რომ კობელი შეცდა, თითქოს შეეძლო ბურთზე თამაში, ლამინემ ხომ ფაქტონბრივად მის მცირე საჯარიმოში ჩააგდო ბურთი, მაგრამ ამ ტრაექტორიით წამოსულ ბურთზე თამაში ალბათ მაინც ძალიან რთულია, რაფინიამ ხელი ასწია და ლამინემაც იდეალურად გადაუკიდა, ბრაზილიელმა თავით გასწვრივ ასევე მაღალი ბურთი გადაკიდა და ლევანდოვსკიმ ცარიელ კარში შეაგდო. რა იყო ეს? ფრენბურთივით გაათამაშეს. კობელ სად ხარ? შენს საჯარიმოში გრეხედბოლს თამაშობენ! 

ბოლო დროს აღარც გამოჩენილა გუნდი, რომელიც მოედნის ცენტრში დე იონგსა და პედრის ბურთს წაართმევდა. მესამე კაცს უფრო მეტი თავისუფლება ეძლევა ხოლმე შეტევაში, ამჯერად ეს კაცი ფერმინ ლოპესი იყო, დანი ოლმო ჯერ არ დაბრუნებულა განაცხადში. ფერმინს მეორე ტაიმში ორი ძალიან კარგი შანსი ჰქონდა და ვალდებულიც იყო გაეტანა, სიზუსტე აკლდებოდა, არადა, როცა ასეთ კონკურენციაში ხარ, ყველა შანსი უნდა შეირგო. 

სამაგიეროდ, საგოლე პასი მიითვალა. 

რომარიოს მსგავსად 

ფერმინის გაფუჭებული მომენტების მერე “ბარსამ” კიდევ ერთი კონტრშეტევა გამოიყენა, ლამინე იამალმა ამჯერადაც გასაოცარი პასით გაიყვანა თავისუფალ ზონაში ფერმინ ლოპესი. საერთოდ, ლამინეს ძალიან კარგი მატჩი ჰქონდა, წინა შეხვედრა ლა ლიგაში, როგორც ჩანს ამოვარდნილი იყო ყველაფრიდან, შესაძლოა, გადაღლა ეტყობა 17 წლის ბიჭს, მაგრამ ფორმა არ დაუკარგავს. 

ფერმინმა დროულად მოძებნა ლევანდოვსკი და ამანაც დუბლი შეასრულა. ისევ გაუტანა ყოფილ კლუბს. რამ გაამწარა.. რა ვიცი.. 

ბოლო გოლი კი ლამინეს ანგარიშზეა. რაფინიამ მეორე საგოლე პასი მიითვალა, კიდევ ერთი კონტრშეტევა, ლამინე ერთი-ერთზე დარჩა, დარტყმამდე მომეჩვენა რომ ცუდი შეხება ჰქონდა ბურთთან, ვიფიქრე ხომ არ გაექცა-მეთქი, ამან კიდევ რომარიოს მსგავსად ბუცის წვეტით შეაგორა კობელის კარში, ეს საწყალი ისევ არ განძრეულა. ძალიან მაღალი კლასია. არ აქვს მის ნიჭს საზღვარი, ბოლო არ უჩანს, ყოველ კვირა რაღაც ახალს გვთავაზობს. მცირე ხანში შეცვლა მოითხოვა, უცნობია დაზიანება აქვს თუ გადაიღალა. კაი ხანი ჰქონდა ხელი აწეული, ფლიკი აიგნორებდა, მერე როგორც იქნა შეიმჩნიეს და შეცვალეს. კი ეკუთვნის კარგი დასვენება. 

ლამინეს ნაცვლად ფატი შემოვიდა, “მონჟუიკმაც” მაგრად შეჰყვირა, აგრძნობინეს, რომ ახსოვთ, ჯერ კიდევ სჯერათ მისი, ლამინესა და ფატის შორის ასაკში სხვაობა 5 წელია. დაგაბნევს ეს სხვაობა ადამიანს. ფატიც ახალგაზრდა ფეხბურთელია, მაგრამ 5 წლით ლამინეზე უფროსი. ახალგაზრდა ფეხბურთელია, მაგრამ ხელი აქვს ჩაქნეული თავის კარიერაზე. რაფინიამ შემოსვლის წინ მაგრად შეაგულიანა, როგორც ჩანს, ეხმარება ფორმის დაბრუნებაში, მაგრამ ანსუმ ზუსტად იქ დაუშვა შეცდომა სადაც რაფინია ერთი-ერთზე უნდა გაეყვანა. თითქოს მარტივი პასი იყო გასაკეთებელი, მაგრამ შეცდა. ისე კი მისი სხეულის ენა არ შეცვლილა, ისევ ამოვარნილი ჩანს, დაკარგული, კონცენტრირებას კვლავ ვერ ახერხებს. 

ეგომ იმსხვერპლაო – ბარსელონურ პრესაში ასე ამბობენ. ნაადრევად დაიჯერა, რომ რაღაცას მიაღწიაო. ასეც არის ალბათ. რას გაიგებ ახლა. 

წინ რა გველის 

წინ მატჩია “ლეგანესთან”, აუცილებლად მოსაგები. ამ სტადიაზე შეცდომა არ მოსულა. ჩემპიონთა ლიგაზე კი “ინტერი” დაწინაურდა. მართალია სტუმრად გატანილის უპირატესობას აღარ თვლიან, მაგრამ მოიგეს მატჩი და აქვთ ეს უპირატესობა. “ინტერი” კიდევ ლიგის მოგების მთავარი ფავორიტია. “ინტერი” ერთადერთი გუნდია, რომელიც წლებია ეტაპობრივად ვითარდება – “მადრიდი” მბაპემ ძალიან შეცვალა, გადაწყობა დასჭირდათ, “არსენალს” ამ ეტაპზე გამოცდილება აკლია, პსჟ-ი სულ ახალი გუნდია, თავისი კვარაცხელია-ბარკოლათი, “ბარსაში” ფლიკმა მხოლოდ წელს დაიწყო გუნდის შენება, “ბაიერნში” კომპანიმ. “ინტერი კიდევ მას მერე რაც ფინალი წააგეს “სიტისთან” იზრდება და იზრდება. ჰოდა, ამ ყველაზე საშიშ გუნდს, სავარაუდოდ ნახევარფინალში შევხვდებით. რაღაც-რაღაცები ცუდად გვახსოვს “ინტერისგან”, გამოსწორების შანსიც იქნება.