მატჩისშემდგომი მიმოხილვა: გასეირნება მონჟუიკზე

     დაიქოქა და აღარ გაჩერდა დალოცვილი. “ვალენსია” ისეთ დღეში ჩააგდეს გარი ნევილი ენატრებათ თავკაცის რანგში. ეს თითქოს “სკამის ხალხი” გამოვარდა და დაგლიჯეს ღამურა. ამჯერად ვირუსს გადავურჩებით. 

ფლიკის “ბარსა” ასგოლიან ნიშნულზე ავიდა და გადააჭარბა კიდეც, მიმდინარე სეზონში “ბარსა” თუ იგებს კარგად იგებს, გემრიელად. მატჩის წინ კი ნამდვილად არ მქონია ეს მოლოდინი, შესუსტებული შემადგენლობა ვნახეთ და კარში შესნი. ეგ კიდევ ვერ არის მთლად კარგი ამბავი, მაგრამ მოულოდნელად (ან ვიღაცისთვის მოსალოდნელად) “ბარსამ” “ვალენსიას” გადაუარა, წიხლი აღარ მიაყოლეს თორემ შეიძლებოდა ათამდე ასვლაც. 

არ იყო პედრი, გავი და ოლმო. ბევრისთვის ეს სამეული ნახევარდაცვის ძირითადია, “ვალენსიასთან” არცერთი არ იყო და გუნდს არაფერი შეტყობია. სკამზე დარჩა ახალი კონტრაქტით კმაყოფილი არაუხო, როგორც კი ხელი მოაწერა თავის გოგოს ხელი თხოვა, იამანაც თანხმობა აჯახა და გაბედნიერდა, მიწაზე დასაშვებად ფლიკმა სკამზე დასვა. 

სკამზე დარჩა ლა ლიგის ბომბარდირიც, ლევანდოვსკი დაასვენეს, ცუდად მომხვდა თვალში, “ვალენსიაა” ბოლოს და ბოლოს, მთავარ ფორვარდს რომ ასვენებ, თან ასეთ რთულ მომენტში, ერთი ფეხის დაცდენაც არ შეიძლება, ფერანი ვნახეთ ფორვარდის პოზიციაზე და.. ვაჰ, ყველაფერი გამოვიდა. 

“ბარსას” დღე 

ერთს ყველაფერი გამოსდის, მეორეს არაფერი. გოლები “ვალენსიამაც” შეყარა, სულ თამაშგარედან, მხოლოდ ერთი გაიტანეს თამაშის წესების დაცვით, და იქ სადაც პენალტი დაინიშნა ასევე ოფსაიდი დააფიქსირეს. მათ კარში კიდევ სულ თამაშგარის ზღვარზე ირბინეს “ბარსელონელებმა”, როგორც ჩანს, ფლიკი მხოლოდ მცველებს არ ავარჯიშებს ხაზის დაცვაზე, ყოველ ჯერზე გამოიჭირეს “ვალენსიას” მცველები და საშინელ დღეშიც ჩააგდეს. 

ყველა საკამათო ეპიზოდი “ბარსას” სასარგებლოდ გადაწყდა. ესეც იშვიათი ამბავია. სტადიონი სავსეა, ფეხბურთელებს თამაში სიამოვნებთ, ფლიკი გახარებულია. თამაში კი საწყის 20 წუთში უკვე დასრულებული იყო. იშვიათად თამაშობენ ერთად – კასადო, დე იონგი და ფერმინი, შეთამაშება სჭირდებათ, ერთმანეთის თამაშის შესწავლა, თითქოს ასე უნდა ყოფილიყო, ამათმა კიდევ ბურთიც აიღეს ცენტრში და მეტოქის კარსაც მაგრად შეუტიეს. სწრაფი გოლი სწორედ დე იონგმა შეაგდო, შეირბინა საჯარიმოში ჩვეულ სტილში (კუმანის “ბარსას” თუ გავიხსენებთ) და იამალის გადასარევი პასის მერე ანგარიში გახსნა. 

ბალდეს პასით ფერანმა ორამდე გაზარდა ანგარიში, კარგი გოლი იყო, ლამაზი. ერთი შეხებით გაგზავნა მამარდას შორეულ კუთხეში. ათი წუთიც არ იყო გასული თამაშის დაწყებიდან. ფერანს კიდევ სამის გატანაც შეეძლო, მაგრამ ფერან ტორესია, ლუის სუარესი ხომ არა?! მერე კიდევ ფერმინმა გაგვაოცა, კი ვიცით რაც შეუძლია, რამდენჯერმე გვაჩვენა უკვე მაღალი კლასი, მაგრამ ხანდახან მაინც იმაზე მეტს აკათებს, ვიდრე ველოდები. 

რაფინიას ჯერიც მოვიდა. უგოლოდო ხომ არ დატოვებდა მოედანს?! პირველი ტაიმის პირველი ნახევარი “ბარსამ” ძალიან მაღალ ტემპში ჩაატარა და “ვალენსია” საერთოდ ვერ აჰყვა, ვერცერთ ზონაში ოდნავი წინააღმდეგობაც ვერ გაუწიეს და შეგეცოდებოდა კიდეც ადამიანს ისეთი უმწეო გუნდი ჩანდა. სახელი დიდი აქვთ, მაგრამ ახლა ცუდი დრო უდგათ. მამარდაც ბოლო სეზონს ატარებს და აღარ გვექნება აწი უხერხულობა მათი კარის აღებისსას. 

იამალის მაგიური მოძრაობა, ფერმინის უსწრაფესი გამორკვევა და პასი ერთი შეხებით – რაფინია ერთი-ერთზეა. ეს ერთადერთი გოლი იყო სადაც მამარდას დადანაშაულება შეიძლება, ნაადრევად დატოვა კარი, რაფინიამ მარტივად მოატყუა და ცარიელ კარში შეაგდო. 

მეოთხე თავად ფერმინმა გაიტანა, უკვე რაიკაარდისა და პეპის “ბარსას” მსგავსი კომბინაციის შედეგად, ასე სიღრმიდან ხან ჩავი შერბოდა ცარიელ სივრცეში, ხანაც კეიტა, ამჯერად ფერმინი შევარდა, რაფა მარკესობა თავის თავზე პაუ კუბარსიმ აიღო და ალბათ ამ შეხვედრის ყველაზე ლამაზი გოლიც გავიდა, გინდა პასი, გინდა დამუშავება, უზუსტესი დარტყმა მაღალ კუთხეში – გენიალურია! 

ტაიმის ბოლოს ფერმინმა დუბლი შეასრულა, რაფინიას შეეძლო იამალის პასის შემდეგ, მაგრამ ძელმა იხსნა კარი, მარჯვენათი ისე ვერ დაარტყა როგორც მარცხენას ურტყამს ხოლმე, გადმოვარდნილ ბურთზე კიდევ “ვალენსიას” ბედოვლათ მცველებს ფერმინმა დაასწრო – 5:0. 

აი, ტაიმი ეს იყო. 

ამ დროს ფიქრად ყოველთვის ერთი რამ მაქვს, იქნებ ათზე ავიდნენ? მაგრამ.. ამჯერად მამარდა მიშლიდა ამ ფიქრებს. 

2+2

“ბარსამ” მეორე ტაიმიც მოიგო, დასაწყისში გოლი გაუშვა, საბოლოოდ კი 2:1 დასრულდა ტაიმი. ჯერ შეცვლაზე შემოსულმა ლევანდოვსკიმ შეაგდო, თავის სტილში, კარგად გათავისუფლდა და უზუსტესად დაარტყა. აქაც ფერმინის პასი იყო – ორი გოლი, ორი საგოლე პასი. დიდებული შეხვედრა ჩაატარა. 

ბოლოს კი მამარდა თავისმა მცველებმაც გაწირეს, პრინციპში, მთელი მატჩი ამას აკათებდნენ, უბრალოდ, შეხვეედრის ბოლოს ნიღაბი მოიხსნეს. 

ცვლილებებიც იყო და “ბარსა” გაჩერდა, ღირსეულად მოიქცნენ, წაქცეულს არ დავარტყამთო ასე თქვეს, ფლიკისთვის ეს მეტად უცნაური ამბავია, მაგრამ ამ მიწაზე ასე ხდება, გერმანიაში კიდევ “ბაიერნმა” იკითხოს. 

მომდევნო მატჩი “ატალანტასთან” არის ჩანიშნული. “ბარსამ” აუცილებლად უნდა მოიგოს იმის იმედად რომ “ლივერპული” ქულებს დაკარგავს, ასეთ შემთხვევაში გუნდი პირველზე გავა და პლუს 10 მილიონს წაუმატებენ, ეგ თანხა კიდე ვინ იცის რაში წაგვეშველება.