მატჩისშემდგომი მიმოხილვა: როკემ გახსნა!

არ ვიცი რამდენად გონივრული იყო ჩავის დარჩენა, შესაძლოა, არც თავად სურდა სეზონის ბოლომდე “ბარსაში” ყოფნა და არც ლაპორტას, მაგრამ ახლა ასეთი მოცემულობაა, “ბარსას” ფული არ აქვს, ნაჩქარევ გადაწყვეტილებას კიდევ რა მოჰყვება წარსულმა კარგად გვაჩვენა. 

ასე რომ, ჩავი სეზონის ბოლომდე აქ არის და ეცდება მაქსიმუმს მიაღწიოს, ოღონდ, მისი მაქსიმუმი ტიტულის მოგებას სულაც არ ნიშნავს. 

არც არაფერი შეცვლილა, გუნდი ისევ გადამწვარს ჰგავს, მოტივაცია ნულამდეა დასული, ალაგ-ალაგ რაღაც მცდელობებია, ერთიანი სურათი კი იმედისმომცემი ნამდვილად არ არის. ჩავი იმდენად უკმაყოფილოა კრისტენსენით რომ ისევ კუბარსი დააყენა დაცვის ცენტრში. კუნდე კვლავ მარჯვნივ გადაისროლა და მანაც ისევ დაუშვა შეცდომები პირველი პასის დროს, ჯობია ფლანგზე შეცდეს, ვიდრე ცენტრში. 

პირველი ტაიმი 

რასაც მთელი სეზონია ვუყურებთ ის ვნახეთ, ერთი განსხვავებით – “ბარსას” პირველ წუთებზე გოლი არ გაუშვია. როგორღაც მოახერხეს და თავი დაიცვეს. მეტოქის კართან კი ვერაფერი შექმნეს, მხოლოდ სტანდარტულებიდან შეიქმნა ორი მოემნტი, ეგ იყო და ეგ, ლევანდოვსკის დარტყმა არ აღმოჩნდა ზუსტი. 

დაცვის ხაზზე ორი სიტყვა ითქვა, ნახევარდაცვის ხაზი კი უფრო საინტერესოდ მეჩვენება, როცა არჩეული სამეულიდან (პედრი, ილქაი, ფრენკი) რომელიმე გვაკლია, ყველაფერს ამას ვაბრალებთ-ხოლმე, რადგან თითოეული დიდი დანაკლისია, თითქოს იდეალური სამეულია ნახევარდაცვისთვის, მაგრამ რეალობა სულ სხვაა, რეალობა ის არის, რომ სამივე რვიანია. ამ სამი რვიანიდან ერთს ექვსიანზე უწევს დახევა, მეტწილად დე იონგს, რადგან ყველაზე დიდი გამოცდილება მას აქვს, თუმცა, გიუნდოგანიც გვინახავს მიმდინარე სეზონში ამ პოზიციაზე, და სულ ცოტა ხნის წინ ვნახეთ როგორ ავალებს ჩავი პედრის რაც შეიძლება სიღრმიდან წამოიღოს ბურთი. 

ბოლო პასის მიცემა სამივეს შეუძლია, მაგრამ კარგი იქნებოდა რომ ამ სამიდან ერთი მაინც კარგი გამტანი იყოს. ახლა მათ შორის ყველაზე გამტანი ფეხბურთელი გიუნდოგანია, მეტოქის კართან ყველაზე სახიფათოა, საჯარიმოშიც ასეა, პედრი და დე იონგი კი ძალიან იშვიათად ურტყამენ კარისკენ. 

მე მაინც მგონია, რომ მიუხედავად ასეთი სათამაშო დისბალანსისა, ამ სამეულისგან შეიძლება რამე გამოვიდეს. დრო მივცეთ ცოტა. ბევრი შეხვედრა არ აქვთ ერთად ჩატარებული. 

შემტევ ხაზში იყო ფერანი, რომელმაც ტრავმის მერე დატოვა მოედანი. ლევანდოვსკი და ლამინე. იამალი ალბათ ერთადერთია, რომლის თამაშშიც რაღაც იმედისმომემია ჩემთვის. 

მეორე ტაიმი

იყო კარგი მონაკვეთები. განსაკუთრებით როკეს გამოსვლის შემდეგ. ამჯერად გაამართლა, ამჯერად ანახა ჩავის რომ ტურისტად არ ჩამოსულა ბარსელონაში. გამოსვლისთანავე სწრაფად გაითამაშეს ბურთი ცენტრში, პირველ ფაზას გაუმკლავდა “ოსასუნა”, შეტევის მეორე ფაზა იამალიმ დაიწყო, ფრენკიმ ფლანგზე გააგრძელა, კანსელუმ ტრიველა დახატა და ვიქტორ როკემ გამოსვლიდან ერთ წუთში თავით შეაგდო გადამწყვეტი გოლი. 

ლამაზი იყო. ოღონდ ცოტაა. “ბარსელონასთვის”, “ოსასუნას” წინააღმდეგ ძალიან ცოტაა. 

მალევე “ოსასუნას” ფეხბურთელი გაუგდეს, ვიფიქრე ახლა მაინც ავცდებით ერთი ბურთის სხვაობას-მეთქი, მაგრამ კინაღამ პირიქით მოხდა, კაცნაკლულ “ოსასუნასაც” კი ჰქონდა გათანაბრების შანსი, თან, არაერთხელ. “ბარსა” გადარჩა, ეს ნაძალადევი სამი ქულაც აიღო და სულ ოდნავ ხასიათიც გამოიკეთა. 

პროგრესი ისევ არ ჩანს. არც მოტივაცია ჩანს. არც რაიმე სიახლე. 

არადა, ჩემპიონთა ლიგის მერვედფინალი ახლოვდება. არ არის კარგ დღეში “ნაპოლი”, მაგრამ არც კვარაცხელიას დამჭერი ფეხბურთელი ჩანს “ბარსელონაში”, ამ დაცვის ხაზთან ოსიმენიც დიდიე დროგბა იქნება. 

ვიცით რომ ეს გუნდი ჩემპიონთა ლიგის ფინალისტი ვერ იქნება, მაგრამ არც თავის შერცხვენა ივარგებს, ყველაფერს თავი რომ დავანებოთ, ერთი გადალახული ეტაპი დიდი ფულია, ეგ კიდე ყველაზე მეტად სჭირდება ახლა “ბარსას”. 

ავარდა ჭორები 

გერმანელები დაწინაურდნენ. ჯერ კლოპი ითქვა, რადგან მისი განცხადება ჩავის ნათქვამს დაემთხვა, ცოტა ხნის წინ კი ფლიკის გვარიც ამოვარდა. არ არის ფლიკი ურიგო ვარიანტი, მე ისევ ლაუდრუპის მომხრე ვარ, მაგრამ ფლიკი უფრო მაღალი დონის სპეციალისტია და თან ზუსტად ვიცით რას უნდა ველოდოთ მისგან. 

შემდეგ წვალებას კი “ალავესთან” ველით.