მატჩისშემდგომი მიმოხილვა: ისევ მეორე რაუნდი

 მოულოდნელი 0:0. ჩემთვის და ალბათ არა მხოლოდ ჩემთვის მოულოდნელი. ფეხის დაცდენასაც აქვს თავის პლუსები, მით უმეტეს, თუ ეს ფეხის დაცდენა ტურნირიდან გავარდნას, ან, დიდ დანაკარგს არ იწვევს. პლუსია ის, რომ ერთთვიანი აღმაფრენის შემდეგ „ბარსა“ მიწაზე დაეშვა. განვლილ ერთ თვეში ჩვენ ვნახეთ საით და რა გზით მიდის გუნდი, მაგრამ, საბოლოო პროდუქტამდე ჯერ შორია. 

საგანგაშოც არაფერია. ვნახეთ, რომ უკან ჩამჯდარ „ნაპოლისთან“ მოგება არ გამოვიდა. „გალათასარაიმ” კიდევ უფრო უკნიდან ითამაშა, კიდევ უფრო იშვიათად უტევდა და ვერც ეს მატჩი მოვიგეთ. განსხვავება კი აუცილებლად იქნება გასვლით შეხვედრაში, „ნაპოლიმ“ სივრცე მოგვცა, თურქები კი სახლშიც დაცვიდან ითამაშებენ, ამიტომ, რთული მატჩი იქნება.

პირველი ტაიმი

ცუდი ტაიმი იყო. ყველაფრით. ტემპი ძალიან დაბალი, ხარისხი დაბალი, კარშიც იშვიათად ვურტყამდით და გააზრებული კომბინაცია საერთოდ არ ყოფილა. შედეგიც ლოგიკური, – 0:0.

პირველი რაც თვალში მოხვდებოდა ადამიანს დაულაგებელი მოედნის ცენტრი იყო. უკვე მივეჩვიეთ, რომ თუ ბუსკეტსი არ არის მოედანზე, ეს პრობლემა მუდმივად იქმნება. ბუსკეტსმა შეიძლება კარგი მატჩი ჩაატაროს, შეიძლება პირიქით, – ცუდი, მაგრამ, როცა მოედანზეა, ყველა და ყველაფერი თავის ადგილზეა.

ამის გარდა, შესამჩნევი იყო ორი პრობლემა, მცველების ძალიან ცუდი პირველი პასი და აბსოლუტურად არაეფექტიანი შემტევი ტრიო. ჩავიმ პიკე დაასვენა და გარდა იმისა, რომ „ბარსამ“ გამოცდილი მცველი და ერთ-ერთი ლიდერი მოისაკლისა, კარგი პირველი პასის მქონე მცველიც გამოგვაკლდა. არაუხო ამ კომპონენტში ძალიან ცუდი იყო, ერიკ გარსია საერთოდ არ რისკავდა, დესტი ამ მხრივ ისედაც არასდროს გამოირჩეოდა და მხოლოდ ჟორდი ალბას კარგი გრძელი პასი ვნახეთ, რომელიც ფერან ტორესმა ვერ შეირგო.

როგორც ზემოთ აღვნიშნე, გამოჩნდა, რომ ჩავიმ ყველაზე შეუთამაშებელი შემტევი ტრიო გამოიყვანა მოედანზე, აღმოჩნდა, რომ დეპაი-ფერანი-ტრაორეს არანაირი საერთო არ აქვთ ერთმანეთთან. სამივე მათგანი ცალ-ცალკე თამაშობდა, ყოველგვარი მთლიანობის გარეშე და შემტევ ნახევარმცველებსაც მაგრად გაურთულეს საქმე.

განსაკუთრებით კარგად ჩანდა ტრაორეს მარტოობა. თავისთვის ითამაშა, მისი ბოლო პასი ხან მცველების იყო, ხან მეკარის. არასდროს იქ არ აწვდიდა სადაც „ბარსას“ ფეხბურთელი იყო და შემტევებიც არასდროს იქ არ იყვნენ, სადაც ტრაორე აკეთებდა პასს.

დარტყმით კი დეპაი ურტყამდა, მაგრამ, ჩვენივე განათხოვრებულმა მეკარემ მშვენივრად ითამაშა, ჯერ კარგი ჯარიმა მოიგერია და შემდეგ შორი მანძილიდან დარტყმულიც აიღო. ეს იყო დეპაი-ტრაორეს ცალ-ცალკე ნაცოდვილარი. აი, ფერანს ეგეც არ გამოუვიდა, არც დრიბლინგი და არც დარტყმები. საერთოდ, ცენტრალური ფორვარდისთვის ფერანი მეტისმეტია. ფლანგზე აშკარად უკეთესია, ცენტრში მარტივად ჩაგრავენ.

საქმე დაცვაშიც იყო, აქტუღლუმ მაღალ დონეზე ჩაატარა პირველი ტაიმი, დესტი ერთი-ორ მომენტში ძალიან მარტივად დაჩაგრა, თუმცა, ეგ აღარც გვიკვირს. მოკლედ, თამაშს ეტყობოდა, რომ „ბარსა“ სათანადოდ ვერ განეწყო და ბოლო თვის განმავლობაში ყველაზე უღიმღამო ტაიმი ჩაატარეს.

მეორე ტაიმი

გავიდა არაუხო, გამოვიდა პიკე, შეტევის დაწყების ხარიხი გაიზარდა. ზოგადად, არც არაუხოს უჭირს პირველი პასი, მაგრამ, კონკრეტულად ამ მატჩში ძალიან ცუდი იყო.

გავიდა ნიკო, გამოვიდა ბუსკეტსი, „ბარსას“ თამაში ბევრად ორგანიზებული და გააზრებული გახდა.

გავიდა ფერანი, გამოვიდა დემბელე, შესაბამისად, ისევ ვიხილეთ ორივე ფლანგიდან გააქტიურებული გუნდი.

ხარისხი გაიზარდა, ტემპმა მოიმატა, მაგრამ გოლი ვერ გავიდა. ხდება ხოლმე. ეგ არაფერი.

შემდეგი სხვლა ობამეიანგის გამოყვანა იყო, მაგრამ, თავად ჩავისაც აქვს ნათქვამი, რომ ობა მაშინ არის საუკეთესო, როცა სივრცე აქვს. გუნდთან, რომელიც მთელი შემადგენლობით უკან დგას, ობამეიანგის მსგავს ფეხბურთელებს, როგორც წესი ძალიან უჭირთ. მიუხედავად ამისა, ერთი რეალური მომენტი მაინც შეიქმნა, ტრაორეს ძალიან კარგი გარღვევის შემდეგ ბურთზე პედრიმ ითამაშა, შემდეგ ობამეიანგი ცდილობდა დარტყმას, მაგრამ პასი გამოვიდა და დე იონგს შეეძლო გატანა, – ერთი მეტრიდან ბურთი ძელს მოარტყა.

თამაშგარე დაფიქსირდა, მაგრამ არ ყოფილა. პედრიზეც აპელირებდნენ თამაშის წესებს არღვევდაო, მაგრამ, არც იქ გამოჩნდა რამე და სავარაუდოდ გოლი ჩაითვლებოდა.

ყველაზე რეალური მომენტი ეგ იყო.

სხვა მხრივ კი შორეული დარტყმები ვნახეთ, – ალბას, ტრაორეს, დემბელეს, დე იონგის, თუმცა, არ გავიდა.

ყველაფერი თურქეთში გადაწყდება. „ბარსას“ კვლავინდებურად ძალიან კარგი შანსი აქვს, რომ სეზონი ტიტულის გარეშე არ დაასრულოს.

შემდეგი მატჩი “ოსასუნასთან” სახლში. მერე “გალათასარაისთან” გავარკვევთ გამსვლელის ვინაობას და სამ დღეში “რეალს” დავეტაკებით, რომელმაც ვარსკვლავური პსჟ დაიფრინა ლიგიდან. 

კარგი მატჩი უნდა გამოვიდეს.