მატჩისშემდგომი მიმოხილვა: პუჩის ნათლობა

რიკი პუჩი ტრადიციულად უკანასკნელ წუთებზე გამოვიდა მოედანზე და სადებიუტო გოლიც გაიტანა. ეს, შესაძლოა, ისტორიული გოლი გამოდგეს, გააჩნია, როგორი კარიერა ექნება პუჩს და რა კვალს დატოვებს “ბარსელონაში”.

სეზონის წინ კუმანი წასვლას თხოვდა, მერე ალენია ამჯობინა და უთხრა, რომ საერთოდ არ მოუწევდა თამაში, რაც სიმართლესთან ახლოს არის და რომ არა კოუტინიოს ტრავმა, ალბათ ეს მცირე დროც არ მიეცემოდა, მაგრამ რიკიმ დარჩენა და ბრძოლა გადაწყვიტა. როცა პოზიციისთვის ებრძვი კონკურენტს, ამ დროს გაცილებით მარტივად არის საქმე, თუ ცუდ თამაშს ჩაატარებს იცი, რომ შანსი მოგეცემა, მაგრამ პუჩის შემთხვევაში კუმანმა აღნიშნა, რომ არსებულ ტაქტიკაში მას საერთოდ ვერ ხედავს. ანუ, რიკის პირდაპირი კონკურენტი არ ჰყავს, მხოლოდ მაშინ შემოდის მოედანზე, როცა თამაშის სცენარი ბოლომდე შესაცვლელია.

მიუხევადა ამ პრობლემებისა, ნიცშეს ოფიციალური ფანკლუბის წევრების ტერმინოლოგია რომ გამოვიყენო, რიკი პუჩმა ხასიათი გამოავლინა!

ჯერ “სოსიედადთან” თერთმეტმეტრიანის შესრულება თავად მოითხოვა და გადამწყვეტი გოლი შეაგდო, მერე ესპანეთის თასზე, ცუდი თამაშის ფონზე, კარგი გამოცდილი კაპიტანივით მსაჯს საქმე ურჩევდა, ახლა კი სადებიუტო გოლიც გაიტანა, არადა სულ რაღაც ხუთი წუთი მისცეს.

აქვს ამ ბიჭს მებრძოლი ხასიათი და ტემპერამენტიც, ეს ხანდახან ცუდად აისახება მის თამაშზე, მაგრამ უმეტესად დადებით მუხტს აძლევს.

გოლი ნიშნავს იმას, რომ სათამაშო დრო უნდა გაიზარდოს. თუნდაც მცირედით, მაგრამ მაინც, ფეხბურთელების მიმართ სამართლიანობა აუცილებელია, პუჩმა კი მეტი დრო დაიმსახურა. ვნახოთ, რას იზამს რონალდ კუმანი.

ცუდი შეტევა

სანამ შემტევებზე ვისაუბრებდე, კარგი იქნება თუ კრიტერიუმებზე ჩამოვყალიბდებით, როგორი კრიტერიუმით უნდა ფასდებოდეს “ბარსელონას” შემტევი. ნუთუ, დრიბლინგი საკმარისია იმისათვის, რომ შემტევმა კარგი შეფასება მიიღოს? მით უმეტეს, ის დრიბლინგები, რომელსაც არანაირი შედეგი არ მოუტანია.

“ბარსას” ფეხბურთელების შეფასებისას კრიტერიუმი ყოველთვის ძალიან მაღალია, განსაკუთრებით შემტევების შემთხვევაში, ამ კლუბს ასეთი ისტორია აქვს, ყველა დროის საუკეთესო შემტევები აქ თამაშობდნენ და თამასაც მაღალია. ამიტომ, ერთი-ორი კარგი ფინტი კარგ თამაშს ნამდვილად არ ნიშნავს. შეიძლება სხვა გუნდში ნიშნავდეს კიდეც, მაგრამ არა “ბარსაში”.

შემტევებმა ითამაშეს ცუდად. ყველაზე აქტიური დემბელე იყო და კუმანმა პირველი სწორედ ის გაიყვანა, ალბათ ბევრი წუნის გამო, თუმცა, ეგ წუნიც იქიდან გაჩნდა, რომ შემტევებიდან ყველაზე ხშირად სწორედ ის იყო ბურთით.

ბრეითუეიტზე კარგი შეიძლება ის ითქვას, რომ ერთხელ კარგად გაიქცა, ეს კრიტერიუმი მხოლოდ ქართველ კომენტატორს თუ დააკმაყოფლებს, რომელიც ქართველი ლეგიონერის თამაშს უძღვება – “ბრწყინვალედ მოტრიალდა”! “შესანიშნავად გაიხედა მარცხნივ”! “ნახეთ, რა ნახტომი”! დაახლოებით ამავე კონტექსტში განიხილება ბრეითუეიტის აქტიურობა – დიდებულად გაიქცა!

გრიზმანს რაც შეეხება, აუცილებლად შექებას იმსახურებს, იმიტომ, რომ პუჩის გოლი ძალიან გაუხარდა. ესეც საქმეა. სიკეთეში და ძმობაში შეგვიძლია ქულები წავუმატოთ.

ტრიო

თქვენი არ ვიცი, მე ძალიან მომწონს “ბარსას” ნახევარდაცვის ტრიო, სამი მოაზროვნე ფეხბურთელი, რომელიც იდეალურად ალაგებს თამაშს. მათ რომ მაღალი კლასის ფორვარდები მიუძღვებოდნენ, მეტოქის საჯარიმოს სიახლოვესაც მშვენივრად დაიჭერდნენ ბურთს, ეს განსაკუთრებით პედრის ეხერხება, უკვე მერამდენედ ვნახეთ, რომ თუნდაც მეტოქის საჯარიმოში უპრობლემოდ ინარჩუნებს ბურთს და სწორ გაგრძელებებსაც პოულობს.

დე იონგი უმატებს და უმატებს. სწორედ ამას ველოდით, არც თუ ისე წარმატებული სეზონის შემდეგ, “ბარსას” ერთ-ერთ ლიდერად ჩამოყალიბდა. გოლებიც გააქვს, საგოლე პასებსაც აკეთებს, დრიბლინგებსაც არ აკლებს და ბურთის დაჭერა ხომ არასდროს უჭირდა.

რა შეიძლება კიდევ მოვთხოვოთ? სტაბილურობა, სხვა არაფერი.

დაცვა

კარგი თამაში ჩაატარეს. ალბა განსაკუთრებით გამოარჩიეს, დაიმსახურა. მისი შემხედვარე სულ სურვილი მიჩნდება, რომ რამდენიმე წლით უფრო ახალგაზრდა იყოს, ალვესის წასვლა ურთულესად გადავიტანეთ და იმედია ალბას წასვლის მერე იგივე დღეში არ აღმოვჩნდებით.

უმტიტიმ ძალიან კარგი შთაბეჭდილება დატოვა, ერთხელ ფეხი დაუცდა, რის გამოც კარში დაგვირტყეს, მაგრამ ეგ სათამაშო პრაქტიკის ნაკლებობის ბრალი მგონია. ტონუსში ჯერ კიდევ ვერ არის. თუმცა, ლანგლეს ახლავე გაუწევს კონკურენციას.

არაუხოსაც არაფერი უჭირდა, მაგრამ ერთ მომენტში მძიმედ შეცდნენ, ისიც და მინგესაც, ამას ვიდეოანალიზისას განვიხილავთ, იმის მაგივრად, რომ მათ შორის მანძილი გაზრდილიყო არაუხო მინგესასკენ დაიძრა, დააბნია და იმანაც მეტოქეს ჩააბარა ბურთი. რომ არა ჩვენი სუპერმენი, კაცმა არ იცის თამაში როგორ მორჩებოდა.

კიდევ ერთი გასვლა გველის “რაიოსთან” და ცოტას ამოვისუნთქებთ. მესიც დაბრუნდება და შეტევის პრობლემა მცირედით მაინც მოიხსნება, აი ფატის დაბრუნებამდე ჯერ კიდევ დიდი დროა.