ოსასუნა-ბარსელონა | მატჩისწინა მიმოხილვა

შემოდგომას კარგი განწყობითა და იმედებით ვხვდებით. ფინანსური სირთულეების მიუხედავად “ბარსელონამ” სატრანსფერო ფანჯრის წარმატებით დახურვა მოახერხა და ბოლო დღეს ჟოაუ კანსელუ და ჟოაუ ფელიში დაიმატა.

ვინ როგორ გაამართლებს, ამას დრო გვიჩვენებს, მაგრამ თუ სახელებით ვიმსჯელებთ, შეგვიძლია ვთქვათ, რომ ევროპაში ყველაზე ვარსკვლავური ტრანსფერები “ბარსელონასი” იყო – ილქაი გიუნდოგანი, ჟოაუ ფელიში და ჟოაუ კანსელუ. მათგან ბოლო ორი სატრანსფერო ფანჯრის ბოლო დღეს გავიფორმეთ და დღეს პორტუგალიური დუეტის დებიუტს ველით.

სათამაშო ფორმა

“ოსასუნა” კარგ ფორმაშია, მაგრამ მხოლოდ სტუმრად. პამპლონელებმა ლა ლიგაში მეტოქის მოედანზე სტუმრად ჩატარებული ორივე შეხვედრა მოიგეს, რასაც ევროპა ლიგაზე “ბრიუგესთან” ფრე მოაყოლეს. საკუთარ კედლებში კი იაგობა არასატეს გუნდი ორივეჯერ დამარცხდა – ერთხელ ესპანეთის ჩემპიონატში და ერთხელაც ევროპა ლიგაზე.

დღევანდელ მასპინძლებს 31 აგვისტოს “ბრიუგესთან” რთული გასვლა ჰქონდათ, რომელიც ტურნირიდან გამოვარდნით დასრულდა. შესაბამისად არასატეს გუნდი “ბარსელონას” დაღლილი და ცუდ ხასიათზე მყოფი დაუხვდება.

“ბარსელონამ” პირველ ტურში “ხეტაფესთან” ქულების დაკარგვის შემდეგ ზედიზედ ორი თამაში მოიგო, მაგრამ ორივეში გაუჭირდა. ჩავის გუნდი სასურველ ფორმაში აშკარად არაა, მაგრამ ისიც ვიცით, რომ “ბლაუგრანას” ფეხბურთელებს გაცილებით მეტი შეუძლიათ და ამის ნახვის იმედი გვაქვს დღეს.

დანაკლისი

“ბარსელონას” კვლავ დიდი დანაკლისი აქვს. კატალონიელებს ტრავმირებული პედრი და რონალდ არაუხო არ ეყოლებათ. სამაგიეროდ 2-2 მატჩიანი დისკვალიფიკაციის მოხდის შემდეგ გუნდს უბრუნდებიან რაფინია და მთავარი მწვრთნელი ჩავი ერნანდესი.

მასპინძლების დანაკლისს მარკო ბრასანაცის არყოფნა შეადგენს.

ურთიერთშეხვედრები

ამ გუნდებს შორის აქამდე ჩატარებულ 94 თამაშში “ბარსელონას” 56 მოგება, 19 ფრე და 19 მარცხი, 210 გატანილი და 79 გაშვებული გოლი დაუგროვდა. სტატისტიკა აჩვენებს, რომ “ოსასუნას” “ბარსას” კარში გოლის გატანა ძალიან უჭირს.

“ბლაუგრანამ” მეტოქეს ბოლო 3 თამაში მოუგო, გასული 10 წლის განმავლობაში ჩატარებულ 14 თამაშში კი კატალონიელებს მხოლოდ ერთი წაგება აქვთ, ისიც საკუთარ კედლებში.

სტუმრად გამართულ 47 შეხვედრაში “ბარსას” 19 მოგება, 15 ფრე და 13 წაგება აქვს. ამ 13 მარცხიდან 10 გუნდების პირველ 14 დაპირისპირებაზე მოდის. 1984 წლამდე “ოსასუნას” ძალიან დიდი უპირატესობა  ჰქონდა, თუმცა მას შემდეგ ჩატარებულ 33 თამაშში პამპლონელებმა საკუთარ კედლებში მხოლოდ 3-ჯერ მოიგეს.

მეტოქის მოედანზე “ბარსას” 2012 წლის შემდეგ არ წაუგია. დროის ამ მონაკვეთში “ბლაუგრანა” ყოველ მეორე თამაშს იგებს, დანარჩენს კი ფრედ თამაშობს. ასე გრძელდება უკვე 7 მატჩია. ამ ლოგიკით დღეს ფრე უწევს.

არბიტრი

შეხვედრას მიგელ ანხელ ორტის არიასი განსჯის.

ორტის არიასი 38 წლისაა. მან მსაჯობა 2009 წელს დაიწყო. 2019 წელს ის ესპანეთის ჩემპიონატის მე-2 დივიზიონში დაწინაურდა, 2021 წლიდან კი ლა ლიგაში მსაჯობს.

კარიერის განმავლობაში არიასი თამაშში საშუალოდ 24.4 ჯარიმასა და 0.33 თერთმეტმეტრიანს ნიშნავს, ფეხბურთელებს კი 5.3 ყვითელ და 0.39 წითელ ბარათს უჩვენებს. მის მიერ განსჯილი თამაშების 44%-ში მასპინძლები იგებენ, ხოლო 33%-ში – სტუმრები.

ორტის არიასის სტატისტიკა “ოსასუნასა” და “ბარსელონას” თამაშებში:

სტატისტიკა

• ამ გუნდებს შორის პამპლონაში გამართული ბოლო 10 თამაშიდან რვაში 3 ან მეტი გოლი გადიოდა;
• “ოსასუნასთან” სტუმრად გამართული ბოლო 10 თამაშიდან ცხრაში “ბარსელონას” მინიმუმ 2 გოლი გაჰქონდა;
• ამ გუნდებს შორის გამართული ბოლო 6 თამაშიდან 5 “ბარსელონამ” მოიგო, ერთი კი ფრედ დასრულდა;
• “ოსასუნა” “ბარსელონასთან” გამართულ ბოლო 11 თამაშში კარის მშრალად შენახვას ვერ ახერხებდა;
• “ბარსელონა” “ოსასუნასთან” გამართული ბოლო 6 თამაშიდან ხუთში ანგარიშის გახსნას ახერხებდა;
• “ოსასუნამ” მიმდინარე სეზონში საკუთარ მოედანზე გამართული ორივე თამაში წააგო;
• ტოტალიზატორები “ბარსელონას” მოგებას კოეფიციენტს 1.6 ანიჭებენ, რაც მოგების 63%-იან შანსს უდრის, “ბარსა” კი ასეთი თამაშების 58%-ს იგებს.

ჩავი მატჩის წინ

ჩავის კომენტარი სრულად

სავარაუდო შემადგენლობები

Sport

ბარსელონა (4-2-3): ტერ შტეგენი, კანსელუ, კუნდე, კრისტენსენი, ბალდე, რომეუ, დე იონგი, გიუნდოგანი, გავი, იამალი, ლევანდოვსკი.

Marca

ბარსელონა (4-3-3): ტერ შტეგენი, კუნდე, კრისტენსენი, ალონსო, ბალდე, რომეუ, დე იონგი, გიუნდოგანი, რაფინია, ლევანდოვსკი, გავი.

AS

ბარსელონა (4-3-3): ტერ შტეგენი, რობერტო, კუნდე, კრისტენსენი, ბალდე, რომეუ, დე იონგი, გიუნდოგანი, რაფინია, ლევანდოვსკი, გავი.

პროგნოზი

• WhoScored: 1-3
• Sportsmole: 1-2
• Sportskeeda: 1-3
• 90min: 0-1