ვინ არის ლამინე იამალი?

“ბარსელონა” “ესპანიოლთან” მატჩისთვის მზადებას განაგრძობს. გადაღლილი ფეხბურთელებისა და რობერტ ლევანდოვსკის დისკვალიფიკაციის ფონზე ჩავი ერნანდესი ახალგაზრდების გამოყენებასაც აპირებს.

Diario AS-ის ინფორმაციით, “ბარსა” ლამინე იამალის აგენტ ივან დე ლა პენიასთან პირველ პროფესიონალურ კონტრაქტზე მოლაპარაკებებს აწარმოებს. გავრცელებული ცნობებით, ჩავი 15 წლის ფეხბურთელის განაცხადში შეყვანასა და კოპა დელ რეიზე გამოცდასაც გეგმავს.

იამალი მატაროში დაიბადა – ქალაქში, სადაც  ანდრეს ინიესტა თავის ცოლს ანა ორტისს შეხვდა – ბარსელონადან 30 კილომეტრის მოშორებით. მისი მამა მაროკოელია, დედა კი – ეკვატორულ გვინეელი. მიუხედავად ამისა, ლამინე ბავშვობიდან “ბარსაშია” და ესპანეთის ასაკობრივ ნაკრებებშიც ასპარეზობს. 

იამალი ამჟამად იმაზე 4 წლით მაღალ კატეგორიაში თამაშობს, ვიდრე თავისი ასაკით უწევს. წელს მან მონაწილეობა ახალგაზრდული ჩემპიონთა ლიგის 5 მატჩში მიიღო, ესპანეთის ნაკრებში კი 13 თვის განმავლობაში 4 სხვადასხვა ასაკობრივ გუნდში ითამაშა – ოქტომბერში ის 19-წლამდელთა ნაკრებშიც მიიწვიეს.

15 წლის ფეხბურთელი ცაციაა და მცველების შესანიშნავად მოტყუება ახასიათებს, რის გამოც მას ლეო მესისაც კი ადარებენ. იამალს რამდენიმე პოზიციაზე ასპარეზობა შეუძლია, თუმცა ის თავს ყველაზე კომფორტულად შეტევის მარჯვენა ფლანგზე გრძნობს.

იამალი ბურთთან ერთად ბრწყინვალედ მოქმედებს და სწრაფი მოძრაობებით დრიბლინგი შეუძლია. იგი ბურთის მიღებისთანავე წინსვლასა და მეტოქის მოტყუებაზე ფიქრობს. აჩქარება და ძლიერი ბალანსი ლამინეს სხვებისგან გამოარჩევს.

ამ ეტაპზე იამალის ნაკლი ალბათ მხოლოდ ისაა, რომ საჰაერო ორთაბრძოლების მოგება და მარჯვენა ფეხის სათანადოდ გამოყენება უჭირს. თუმცა, დროის გასვლასთან ერთად, ეჭვგარეშეა, რომ ის პროგრესს განიცდის და ამაში “ბარსელონაც” ხელს შეუწყობს.