ოფიციალურად: ლივაკოვიჩი ბარსელონას ფეხბურთელია

უკვე ოფიციალურად დადასტურდა: 31 წლის დომინიკ ლივაკოვიჩი მომდევნო 4 სეზონის განმავლობაში (2030 წლამდე) “ბარსელონას” მეკარე იქნება. ახლა მხოლოდ ის არის გასარკვევი, დარჩება ხორვატი მიმდინარე სეზონში ჟოან გარსიას დუბლიორად, თუ იჯარით წავა, სანამ ვოიცეხ შჩესნი ბლაუგრანაში კონტრაქტის ბოლო წელს ამოწურავს.

ტრანსფერის დეტალები და ხელმოწერის ცერემონია

ლივაკოვიჩის ტრანსფერის გამოცხადება ოთხშაბათს იგეგმებოდა, თუმცა “ბარსელონას” “ფენერბაჰჩესგან” საბოლოო დოკუმენტების მიღება დააგვიანდა. საბუთებთან დაკავშირებული საკითხები უკვე მოგვარებულია და გამოცდილი მეკარე ოფიციალურად “ბარსას” ფეხბურთლია. კატალონიური კლუბი ტრანსფერში 4 მილიონ ევროს გადაიხდის (2 მილიონი ფიქსირებული, 2 – ბონუსების სახით).

ხორვატი ბარსელონაში სამშაბათს ჩაფრინდა და ოთხშაბათს სამედიცინო შემოწმება წარმატებით გაიარა. ამის შემდეგ მან “ბარსელონაში” ტრანსფერი რესტორან Botafumeiro-ში პრეზიდენტ ჟოან ლაპორტასთან და ვიცე-პრეზიდენტ რაფა იუსტესთან ერთად აღნიშნა. ვახშამს მისი აგენტი, ენდი ბარაც ესწრებოდა. მოგვიანებით შედგა კონტრაქტზე ხელმოწერის ცერემონია, რომელსაც დეკუ და ბოიან კრკიჩი ესწრებოდნენ.

ჰანსი ფლიკის პოზიცია

მთავარმა მწვრთნელმა, ჰანსი ფლიკმა “ატლეტიკთან” მატჩის წინ ლივაკოვიჩის დამატებაზეც ისაუბრა და მისი გუნდში დარჩენის საკითხი ღიად დატოვა:

“კარგია მომავალი წლებისთვის გამოცდილი მეკარის ყოლა.”

გერმანელმა სპეციალისტმა ასევე გამოხატა კმაყოფილება სათადარიგო მეკარის პოზიციაზე ვოიცეხ შჩესნის თამაშით.

დომინიკ ლივაკოვიჩი დიდი გამოცდილების მქონე მეკარეა, რომელმაც ხორვატიის ეროვნულ ნაკრებში შესანიშნავი თამაშით გამოიჩინა თავი. ვნახავთ, გადაწყვეტს თუ არა “ბარსელონა” მის გუნდში დატოვებას, თუ ფეხბურთელს იჯარით გაუშვებს (ამ შემთხვევაში ყველაზე რეალურ ვარიანტად “დინამო ზაგრები” განიხილება).