რა კავშირი აქვს გარეთ ბეილს კოუტინიოს "ბაიერნში" გადასვლასთან?
კატალონიური Sport, ფილიპე კოუტინიოს ტრანსფერთან დაკავშირებით, საინტერესო თეორიას ავითარებს.
ბოლო დღეებში ცნობილი იყო, რომ მიუნხენის "ბაიერნი" კოუტინიოთი დაინტერესებული იყო, მაგრამ "ბარსას" ბრაზილიელის "პარი სენ-ჟერმენში" გაშვება ერჩივნა, რათა ნეიმარის "ბლაუგრანში" დაბრუნება გაეადვილებინა.
კოუტინიოს "ბაიერნში" ტრანსფერი რამდენიმე საათის წინ ოფიციალურად დადასტურდა, რაც წესით იმას უნდა ნიშნავდეს, რომ "ბარსას" ნეიმარის ხელში ჩაგდება გაუჭირდება, მაგრამ კატალონიელი ჟურნალისტები ასე არ ფიქრობენ.
გავრცელებული ცნობებით, მიუნხენის "ბაიერნი" კოუტინიოს ალტერნატივად გარეთ ბეილს განიხილავდა. თუ მიუნხენელები უელსელს გადაიბირებდნენ, "რეალს" ნეიმარის დამატების შანსი ეზრდებოდა, რადგან "სამეფო კლუბი" ტრანსფერიდანაც მიიღებდა თანხას და სამეფო კლუბს სახელფასო ბიუჯეტიც მნიშვნელოვნად გაეზრდებოდა. როდესაც "ბარსელონამ" "ბაიერნსა" და ბეილს შორის მოლაპარაკებების შესახებ გაიგო, კოუტინიოს ტრანსფერი დააჩქარა, რითიც უელსელის "რეალში" დარჩენა უზრუნველყო.
Sport-ის ცნობით, თუ რამე განსაკუთრებული არ მოხდა, ბეილი "რეალში" დარჩება, რაც მადრიდელებს ნეიმარის დამატებას გაურთულებს. ეს კი ბრაზილიელისთვის ბრძოლაში ფავორიტად კვლავ "ბარსელონას" ტოვებს.
ამ სიახლეზე კომენტარები გათიშულია.
კომენტარები [ 4 ]