ლევანდოვსკი ლა ლიგის საუკეთესო ბომბარდირობისთვის იბრძვის

"ბარსელონას" ლიდერი რობერტ ლევანდოვსკი ლა ლიგის 2023/24 წლების გათამაშების "პიჩიჩის" ჯილდოსთვის ბრძოლას განაგრძობს.

ამჟამად ესპანეთის ჩემპიონატის ბომბარდირთა დავას 20 გოლით "ჟირონას" უკრაინელი თავდამსხმელი არტემ დოვბიკი ლიდერობს, რომელსაც 18 ბურთით "რეალ მადრიდის" შემტევი ნახევარმცველი ჯუდ ბელინგემი მოსდევს. შემდეგ მოდის ლევანდოვსკი, რომლის ანგარიშზეც 17 გოლია და ტურნირის საუკეთესო ბომბარდირობის შანსიც აქვს.

ლევანდოვსკი სათანადო ფორმაში ნამდვილად არ იმყოფება, მაგრამ ბოლო 2 თამაშში რობერტი უკეთ ათამაშდა. პოლონელმა თავდამსხმელმა "ვალენსიასთან" ჰეთ თრიქი შეასრულა, "ჟირონასთან" კი თავი გოლით გამოიჩინა.

ლა ლიგაში 4 ტური დარჩა. "სოსიედადთან" და "რაიოსთან" სახლში გვაქვს სათამაშო, "ალმერიასთან" და "სევილიასთან" კი - სტუმრად. საინტერესოა, რომ ლევანდოვსკიმ სეზონის პირველ წრეში გოლი ვერცერთ მათგანს გაუტანა. იმედი ვიქონიოთ, 35 წლის შემტევი მეორე წრეში ამას გამოასწორებს, ხსენებული გუნდების კარს აიღებს და "პიჩიჩისაც" მოიგებს, რაც ლა ლიგაში მისთვის პირველ სეზონში უკვე გაუკეთებია.