ვიტორ როკეს აგენტი: გაუგებარია, ჩავი მას რატომ არ ათამაშებს
ვიტორ როკეს აგენტი, ანდრე კური, კატალონიის რადიოსთან საუბრისას, თავისი კლიენტის ვითარებას შეეხო:
ვიტორი გუნდს იჯარით არ დატოვებს. თუ ის წავა, ეს მხოლოდ პერმანენტული ტრანსფერით მოხდება. დეკუს უკვე ვესაუბრე, მისი განათხოვრება გამორიცხულია. იჯარამ, შესაძლოა, როკეს კარიერას საფრთხე შეუქმნას - წარმოიდგენეთ ისეთ კლუბში თამაში, რომელიც არ გფლობს და შენი განვითარებით დაინტერესებული არაა...
არავის ესმის, ჩავი მას რატომ არ ათამაშებს და რატომ არ ესაუბრება - ეს არასწორია. მწვრთნელი ფერმინს, კუბარსისა და ლამინს დროს აძლევს, მაგრამ არა ვიტორს - გაუგებარია, რატომ?
ჩავიმ თქვა, რომ როკეს თავდაჯერებულობის მოპოვება სჭირდება. მას ვეტყვი, რომ ფეხბურთელს თავდაჯერებულობის მოპოვებაში სწორედ მწვრთნელი უნდა დაეხმაროს და შანსები მისცეს. ვიტორი მენტალურად ძალიან ძლიერია, მაგრამ თავდაჯერებულობის მოპოვება რთულია, როცა არ გათამაშებენ.
ბარსას კარგი სეზონი არ აქვს. გუნდი ბევრ გოლს უშვებს და ეს ფეხბურთელისთვისაც ცუდია. ვიტორმა 300 წუთში 2 გოლი გაიტანა და ვიტყოდი, რომ თუ საშუალოდ ნათამაშებ დროს შევხედავთ, ის გუნდის ბომბარდირია. პსჟ-ს წინააღმდეგ გოლის გატანა გვჭირდებოდა და რატომ არ შემოიყვანა ჩავიმ როკე?
ფეხბურთელის მომავალს მალე განხივილავთ. ჩვენ ბარსა იმიტომ ავირჩიეთ, რომ ვიტორს ეს კლუბი უყვარს. სხვა შემოთავაზებებიც გვქონდა და ორჯერ მეტს გვიხდიდნენ. მაგრამ, თუ გამოსავალს ვერ ვიპოვით, სხვაგან გადავალთ.
ვიტორმა უფრო მეტი უნდა იმუშაოს და შესაძლებლობებს დაელოდოს, მაგრამ იყო ბევრი მატჩი, რომელშიც მისთვის შანსის მიცემა შეიძლებოდა, თუმცა ასე არ მოხდა. როკეს თავისი უნარების გამოვლენა ძალიან სურს. ბარსელონაში ბევრი ჟურნალისტი ალოგიკურ რაღაცებს ამბობს.
შეხედეთ, როგორ განვითარდა ვინისიუს ჟუნიორის კარიერა რეალ მადრიდში. მას ამ დონეზე ასასვლელად ორწელიწადნახევარი დასჭირდა. აქ, ბარსელონაში 2 თვეში ქაოსი შეიქმნა და ხალხს ვიტორ როკეს მოკვლა სურს, იმის ნაცვლად, რომ მას დაეხმარონ. დარწმუნებული ვარ, რომ ბრაზილიელი დიდებული ფეხბურთელი გახდება.
საუკეთესო ვარიანტი ბარსელონაში დარჩენაა, აქ ბედნიერები ვართ, მაგრამ თუ მას შანსს არ მისცემენ...
Mundo Deportivo-ს ინფორმაციით, ვიტორი გაურკვევლობაშია. ამჟამინდელი სიტუაცია მასზე ძალიან მოქმედებს და სახლშიც კი მოწყენილია. გარდა ამისა, ფეხბურთელის გარემოცვა ამბობს, რომ ჩავი მას არ ესაუბრება და ასეთ ვითარებაში პროგრესი წარმოუდგენელია.
ამავე წყაროს ცნობით, სამწვრთნელო შტაბი ამას უარყოფს და ამბობს, რომ როკესთვის სპეციალური ვიდეო მოამზადეს, რომელშიც ასახულია, თუ რას ითხოვენ ბრაზილიელისგან. მათი თქმით, ჩავი ვიტორს შეცდომებზე ყოველთვის მიუთითებს და სავარჯიშო სესიებზე ყველაზე მეტად ამხნევებს.
ამ სიახლეზე კომენტარები გათიშულია.
კომენტარები [ 20 ]