მარკ კუკურელია: ბარსელონაში დაბრუნებაზე უარის თქმა რთული იქნება

ესპანეთის ნაკრებისა და ლონდონის “ჩელსის” მცველმა, მარკ კუკურელიამ, კიდევ ერთხელ მიიქცია ყურადღება – ამჯერად “ბარსელონაზე” გაკეთებული კომენტარით.

კუკურელია ესპანეთის ნაკრების შეკრებაზე, ეგვიპტესთან ამხანაგური მატჩის წინ გამართულ პრესკონფერენციაზე, კატალონიურ კლუბში შესაძლო დაბრუნების თემას არ გაექცა და საკმაოდ გულწრფელი პასუხი გასცა.

მისი სიტყვებით:

უარის თქმა რთული იქნებოდა. მხოლოდ მე არ ვარ – ოჯახზეც უნდა ვიფიქრო. თუ ასეთი რამ მოხდება, შევხედავთ და გადაწყვეტილებას ერთად მივიღებთ.

ამ განცხადებით ესპანელმა ფეხბურთელმა მიანიშნა, რომ კონკრეტული არაფერი ხდება, თუმცა “ბარსელონაში” დაბრუნების შესაძლებლობა მისთვის უმნიშვნელო ნამდვილად არ არის.

მარკ კუკურელია “ბარსელონას” სკოლის აღზრდილია. ის კატალონიურ კლუბში 2012-2019 წლებში ირიცხებოდა, თუმცა ესპანელ მარცხენა მცველს “ბლაუგრანას” პირველ გუნდში მხოლოდ ერთი თამაშის აქვს ჩატარებული – 2017 წელს, ესპანეთის თასზე “მურსიასთან” გამართულ შეხვედრაში მოედანზე 7 წუთი გაატარა.