ცრვენა ზვეზდა 2-5 ბარსელონა | ჰანსი ფლიკის გუნდის მორიგი ბრწყინვალე მატჩი

ბარსელონამ ჩემპიონთა ლიგის მე-4 ტურში, რაიკო მიტიჩზე, ცრვენა ზვეზდა 5-2 გაანადგურა. 

მე-13 წუთზე ინიგო მარტინესმა ბარსა დააწინაურა [1-0]. ამის შემდეგ, მასპინძელთა კონგოელმა შემტევმა, სილასმა (27′) ანგარიში გაათანაბრა [1-1], მაგრამ პირველი ტაიმის მიწურულს რობერტ ლევანდოვსკიმ (43′) “ბლაუგრანა” კვლავ წინ გაიყვანა [2-1]. 

53-ე წუთზე ლევანდოვსკიმ სხვაობა ორამდე გაზარდა [3-1]. მალევე, 2 წუთში რაფინიამ ანგარიში განადგურებელი გახადა [4-1], 76-ე წუთზე კი, ცვლილებაზე შემოსულმა ფერმინ ლოპესმაც გაიტანა [5-1]. 84-ე წუთზე, სერბთა ანგოლელმა ლეგიონერმა, ფელისიო მილსონმა 1 ბურთი გაქვითა და საბოლოო შედეგიც დაფიქსირდა: 5-2.

აღსანიშნავია, რომ დღევანდელ შეხვედრაში ჟიულ კუნდემ 3 ასისტი მიითვალა, საუკეთესო ფეხბურთელად კი ინიგო მარტინესი დასახელდა.

ამ მოგების შემდეგ კატალონიურ გრანდს 9 ქულა აქვს და ჩემპიონთა ლიგის სატურნირო ცხრილში მე-6 ადგილზე იმყოფება. 

ბარსელონას მომდევნო მატჩი ლა ლიგაში, გასვლაზე, რეალ სოსიედადის წინააღმდეგ ელის (10 ნოემბერი, 23:55), შემდეგ კი სანაკრებო პაუზის დროა.