დეკუ დე იონგისა და ლევანდოვსკის კონტრაქტზე, გარსიაზე, რაშფორდზე, ბარდჯიზე, ინიგოზე, პსჟ-ზე…

მოლაპარაკებებს ვაწარმოებთ. ვფიქრობ, შეთანხმებას მივაღწევთ. დე იონგი ჩვენთვის მნიშვნელოვანი ფეხბურთელია და ვფიქრობ, ის “ბარსელონაში” ბედნიერია. ფრენკით ჩვენც კმაყოფილები ვართ, ამიტომ არამგონია, რამე პრობლემა შეიქმნას.

ლევანდოვსკის სიტუაცია განსხვავებულია. რობერტი ჩვენთვის მნიშვნელოვანი იყო და ეს დღესაც ასეა. ასევე, ვფიქრობ, ასაკის გათვალისწინებით ის მრავალწლიან კონტრაქტს არ გააფორმებს. კარიერაში დგება მომენტი, როდესაც გრძელვადიან გეგმებს არ ადგენ. ვფიქრობ, ლევანდოვსკი მიმდინარე სეზონზეა ფოკუსირებული. ასე ვართ ჩვენც, შემდეგ კი ვნახოთ.

სეზონის დასაწყისში მთავარი პრიორიტეტი იმის შენარჩუნება იყო, რაც გვქონდა და მნიშვნელოვანი ფეხბურთელები არ დაგვეკარგა. იამალის, რაფინიასა და კუნდეს კონტრაქტების გახანგრძლივება მოვახერხეთ. იდეა ბოლო წლებში ჩამოყალიბებული გუნდის ბაზის შენარჩუნება და მისი გაუმჯობესება იყო.

ჟოან გარსიას გარკვეული პერიოდი ვაკვირდებოდით. ის ზაფხულის პრიორიტეტი არ ყოფილა, მაგრამ საბოლოოდ, ტერ შტეგენის შარშანდელი ტრავმის გამო, ჩვენი გეგმების ნაწილი გახდა. გადაწყვეტილების სწრაფად მიღება მოგვიწია. ბოლო ორი წლის განმავლობაში ასეთ სიტუაციაში არასდროს ვყოფილვართ.

რაშფორდის მსგავსი ფეხბურთელი გვჭირდებოდა, რომელსაც შეუძლია თამაში როგორც ფლანგზე, ასევე ცენტრში. ზაფხულში ამას განვიხილავდით. არ ვფიქრობდით, რომ სასწრაფო ცვლილება გვჭირდებოდა, თუ ბოლო წუთს რამე არ მოხდებოდა.

მოვიყვანეთ ბარდჯი, რომელიც ახალგაზრდაა და რომელსაც დიდი ხანი ვაკვირდებოდით. წინასასეზონო სამზადისისთვის ბევრი ახალგაზრდა მოვიყვანეთ. 2-3 მოთამაშე გვყავს, რომლებსაც, ჩვენი აზრით, პირველ გუნდში თავის დამკვიდრება შეუძლიათ.

ინიგო მარტინესთან დაკავშირებით, რომელსაც საუდის არაბეთიდან შეთავაზება ჰქონდა, გაუთვალისწინებელი პრობლემა შეიქმნა. ეს განსხვავებული საკითხი იყო, განსაკუთრებით ინიგოს ასაკის გათვალისწინებით. მადლიერების ნიშნად მას კარიერის ისე დასრულების ნება მივეცით, როგორც თავად უნდოდა.

ჩემპიონთა ლიგაზე ბევრი გუნდია, რომლებიც კარგად გაძლიერდნენ, მაგალითად, “ლივერპული”, “რეალ მადრიდი”… გუნდები უკეთესები არიან. თუ ფინალში გასვლა გვინდა, ძალიან ძლიერები უნდა ვიყოთ.

“პარი სენ-ჟერმენმა” ბოლო რამდენიმე წლის განმავლობაში სწორი ტრანსფერები განახორციელა და შესანიშნავი გუნდი ჩამოაყალიბა. მათ ჰყავთ ძალიან კონკურენტუნარიანი მწვრთნელი, რომელიც ძალიან მომწონს. პსჟ კვლავ ჩემპიონთა ლიგის მოგების ერთ-ერთი მთავარი კანდიდატია. მათთან კარგი და სანახაობრივი მატჩი იქნება, მაგრამ ფლეი ოფზე უნდა ვიფიქროთ. ნაბიჯ-ნაბიჯ უნდა ვიმოქმედოთ. ჩემპიონთა ლიგაზე ოცნებას აზრი არ აქვს, თუ ჯგუფურ ეტაპს ვერ გადალახავ. უნდა ვეცადოთ ქულების მოგროვებას მიზნის მისაღწევად, რაც ფლეი ოფში გასვლაა.

ვფიქრობ, გასულ სეზონში გასვლით მატჩებთან დაკავშირებით უსამართლობა მოხდა. 8 საუკეთესო გუნდში მოხვედრის უპირატესობა გარკვეული დროით დაკარგული გვქონდა. ფლეი ოფის თითქმის ყველა განმეორებითი შეხვედრა სტუმრად ჩავატარეთ, მაგალითად, 1/4-ფინალსა და 1/2 ფინალში. ვფიქრობდი, რომ საუკეთესო გუნდებს უპირატესობა ექნებოდათ. წელს ეს გამოასწორეს. გაუმჯობესების შესაძლებლობა ყოველთვისაა, მაგრამ მოდელი მომწონს.