“ბარსელონას” აკადემიის 7 ფეხბურთელი ესპანეთის 17-წლამდელთა ნაკრებთან ერთად მსოფლიო ჩემპიონატზე იასპარეზებს, რომელიც ყატარში 19 ნოემბრიდან 13 დეკემბრამდე გაიმართება.
Mundo Deportivo-ს ინფორმაციით, ნაკრების მთავარმა მწვრთნელმა დავიდ კუბილიომ ტურნირისთვის “ბლაუგრანას” შემდეგი ფეხბურთელები გამოიძახა:
- მცველები: რაულ ექსპოსიტო, სერხი მაიანსი, ბაბა კურუმა და ჟორდი პესკერი;
- ნახევარმცველები: ებრიმა ტუნკარა და რობერტო ტომასი;
- გარემარბი: იუ მარტინესი.
გამოძახებული ფეხბურთელები 9 ნოემბერს მადრიდში შეიკრიბებიან და მსოფლიო ჩემპიონატისთვის მზადებას დაიწყებენ.
ესპანეთი H ჯგუფში მაროკოსთან, ფიჯისა და ჩინეთთან ერთად ითამაშებს. ესპანელებს ტურნირი არასდროს მოუგიათ და ყატარში პირველი ტიტულის მოპოვებას შეეცდებიან.
აღსანიშნავია, რომ ესპანეთის ნაკრების შემადგენლობის ძირითად ნაწილს 2009 წელს დაბადებული ფეხბურთელები შეადგენენ. FIFA ასაკობრივ კატეგორიებს კალენდარული წლით განსაზღვრავს, UEFA და ესპანეთის ფეხბურთის ფედერაცია კი სეზონს 1 ივლისიდან 30 ივნისამდე ითვლიან. შესაბამისად, ეს ფეხბურთელები ესპანეთში უკვე 18-წლამდელთა ნაკრებს მიეკუთვნებიან.
გამოძახებულთა შორის განსაკუთრებით გამორჩეულია ებრიმა ტუნკარა, რომელიც 2026 წლის ივნისში ევროპის 17-წლამდელთა ჩემპიონატის საუკეთესო ფეხბურთელად დასახელდა.
სერიოზული დანაკლისი ბარსა ატლეტიკისთვის
მსოფლიო ჩემპიონატზე ფეხბურთელების გამგზავრება “ბარსელონას” ახალგაზრდულ გუნდებს მნიშვნელოვან პრობლემებს შეუქმნის.
განსაკუთრებით რთულ მდგომარეობაში აღმოჩნდება “ბარსა ატლეტიკის” მთავარი მწვრთნელი ჟულიანო ბელეტი, რომელსაც მომდევნო თვეში სერხი მაიანსის, ჟორდი პესკერისა და ებრიმა ტუნკარას გარეშე მოუწევს მუშაობა.
ამას ემატება ესპანეთის 19-წლამდელთა ნაკრებში გამოძახებული კიდევ 4 ფეხბურთელი: მეკარე იკერ როდრიგესი, მცველი ალექს კამპოსი, ნახევარმცველი პედრო როდრიგესი და გარემარბი ჯონი ერნანდესი.
ისინი 11-17 ნოემბერს უელსში გასამართ ოფიციალურ ტურნირში მიიღებენ მონაწილეობას, სადაც ესპანეთის მეტოქეები ისლანდია, უელსი და ფინეთი იქნებიან.
შესაბამისად, აღნიშნული ოთხეული “ბარსა ატლეტიკს” “ჟირონა B-სთან” მატჩში ვერ დაეხმარება.
forum კომენტარები (0)