ევროპაში ყველაზე მეტ საგოლე მომენტს რაფინია ქმნის

“ბარსელონას” ბრაზილიელი გარემარბი რაფინია რომ მიმდინარე სეზონში ბრწყინვალედ გამოიყურება, ამაზე სტატისტიკაც მოწმობს.

27 წლის შემტევი ყოველთვის შესანიშნავი თანაგუნდელი და მცველებისთვის დიდი თავისტკივილი იყო, ამ სეზონში კი ის უფრო თავდაჯერებულად თამაშობს და მეტიც, ჰანსი ფლიკის ხელში უფრო და უფრო უკეთესი ხდება.

კატალონიური კლუბის ოფიციალური ვებგვერდის ცნობით, რაფინიამ ლა ლიგის მიმდინარე გათამაშებაში, 9 მატჩში, უკვე 32 საგოლე მომენტი შექმნა, რაც ევროპის წამყვან 5 ჩემპიონატში საუკეთესო შედეგია. მასთან ყველაზე ახლოს იმყოფება ბუკაიო საკა, რომელმაც 27 საგოლე შანსი შექმნა. “არსენალის” გარემარბის შემდეგ მოდიან “მიონხენგლადბახის” ნახევარმცველი კევინ სტოგერი და “ვილიარეალის” შემტევი ალექს ბაენა, შესაბამისად, 26 და 25 (ლა ლიგაში მეორე საუკეთესო შედეგი) საგოლე მომენტით.

იმის სადემონსტრაციოდ, თუ რამდენად შთამბეჭდავია რაფინიას შედეგი, 2003 წლიდან, ანუ მას შემდეგ, რაც ამ სტატისტიკას ითვლიან, “ბარსელონაში” ბრაზილიელზე მეტი საგოლე შანსი, 34, ესპანეთის ჩემპიონატის პირველ 9 შეხვედრაში მხოლოდ ჩავი ერნანდესმა შექმნა. ეს 2008/09 წლების სეზონში მოხდა.