ოფიციალურად: რაფინიამ ბარსელონასთან კონტრაქტი გაახანგრძლივა

5 ნოემბერს “ბარსელონამ” ოფიციალურად გამოაცხადა, რომ გუნდის ბრაზილიელ კაპიტან რაფინიასთან კონტრაქტი 2030 წლის 30 ივნისამდე გაახანგრძლივა. ახალი შეთანხმებით, ფეხბურთელის მოქმედი კონტრაქტი კიდევ ორი წლით გაგრძელდა.

ხელშეკრულების გაფორმების ცერემონიის შემდეგ რაფინიამ კლუბში დარჩენით გამოწვეულ სიხარულზე, საკუთარ ფიზიკურ მდგომარეობასა და სამომავლო მიზნებზე ისაუბრა.

“ძალიან ვამაყობ იმ ყველაფრით, რასაც ამ კლუბში მივაღწიე, როგორც ინდივიდუალურად, ისე გუნდთან ერთად. იმედი მაქვს, აქ კიდევ მრავალი წელი დავრჩები და, თუ ფეხები ამის საშუალებას მომცემს, მაღალ დონეზე თამაშს გავაგრძელებ. კლუბისთვის ყველაფერს ვაკეთებ, რაც შემიძლია.”

ბრაზილიელმა ფეხბურთელმა საკუთარი ფიზიკური მდგომარეობაც შეაფასა:

“თავს ძალიან კარგად ვგრძნობ, თუმცა ჯერ 100%-ით მზად არ ვარ. საკუთარ თავს ძალიან ვუფრთხილდები, ამიტომ გულშემატკივრებმა არ უნდა ინერვიულონ. ყველაფერს ვაკეთებ იმისთვის, რომ საუკეთესო ფორმაში ვიყო.”

რაფინიამ მიმდინარე სეზონში საკუთარი შედეგებით კმაყოფილება გამოთქვა, თუმცა აღნიშნა, რომ კიდევ ერთი მნიშვნელოვანი მიზანი აქვს.

“ამ სეზონის მაჩვენებლები ძალიან კარგია, მაგრამ ერთი ტიტული ჯერ კიდევ მაკლია. 2030 წლამდე ამ მაისურით რაც შეიძლება ბევრი ტიტულის მოგება მინდა.”

ფეხბურთელმა ცენტრალური თავდამსხმელის პოზიციაზე თამაშზეც ისაუბრა:

“პოზიცია შევიცვალე და ვცდილობ, ყველასთვის მაქსიმუმი გავაკეთო. ვცდილობ, ნებისმიერ მოთხოვნას მოვერგო. ეს მომწონს და ყველაფერი უფრო მარტივია, როდესაც გუნდში ასეთი ხარისხის ფეხბურთელები გვყავს.”

რაფინიამ “ბარსელონაში” გატარებული პირველი წლებიც გაიხსენა:

“მინდა, კლუბისთვის საუკეთესო გავიღო და გულშემატკივრების გულებში ადგილი დავიმკვიდრო. პირველ ორ სეზონში ვერც კი წარმოვიდგენდი, რომ ახლა ასეთ მდგომარეობაში ვიქნებოდი. ვიცოდი, რა შემეძლო და რისი მიცემა შემეძლო ამ კლუბისთვის. მჯეროდა ჩემი შრომისა და მონდომების.”

რაფინია “ბარსელონას” 2022/23 წლების სეზონში შეუერთდა და კატალონიურ გუნდში უკვე მეხუთე სეზონს ატარებს. მის ანგარიშზე 190 მატჩი და 94 გოლია.

ამ პერიოდში ბრაზილიელმა სამჯერ მოიგო ესპანეთის ჩემპიონატი (2022/23, 2024/25 და 2025/26), ერთხელ ესპანეთის თასი (2024/25) და სამჯერ ესპანეთის სუპერ თასი (2022/23, 2024/25 და 2025/26).

რაფინია “ბარსელონას” ისტორიაში ბრაზილიელ ფეხბურთელებს შორის ჩატარებული მატჩებისა და გატანილი გოლების რაოდენობით მეოთხე ადგილს იკავებს. “ასტონ ვილასთან” შეხვედრის შემდეგ ის მატჩების რაოდენობით ადრიანო კორეიას გაუთანაბრდა.

2026/27 წლების სეზონში ბრაზილიელი შესანიშნავ ფორმაშია. მას უკვე 19 გოლი აქვს გატანილი, რომელთაგან 15 ლა ლიგაზე მოდის, ხოლო 4 – ჩემპიონთა ლიგაზე. ამ შედეგით რაფინია ესპანეთის ჩემპიონატის მიმდინარე სეზონის საუკეთესო ბომბარდირია.