დეკუ აგვისტოში ნეიმარს დაუკავშირდა – Sport

სიახლე არავისთვისაა, რომ გასულ ზაფხულში ბრაზილიელი ვარსკვლავის, ნეიმარის “ბარსელონაში” დაბრუნების შანსი არსებობდა. Sport ამასთან დაკავშირებით ინფორმაციას ავრცელებს.

აგვისტოში, როდესაც უსმან დემბელე უკვე “პარი სენ-ჟერმენის” საკუთრება იყო, სატრანსფერო ბაზარზე მოულოდნელად ნეიმარის ვარიანტი გამოჩნდა. პარიზელებმა ფეხბურთელს აცნობეს, რომ კლუბი უნდა დაეტოვებინა, რის შემდეგაც 31 წლის შემტევის წარმომადგენლებმა სხვადასხვა ვარიანტის მოძიება დაიწყეს.

კატალონიური წყაროს ინფორმაციით, სწორედ ამ პერიოდში “ბარსას” სპორტული დირექტორი დეკუ ნეიმარის ოჯახს დაუკავშირდა, რათა გაეგო, ჰქონდა თუ არა ბრაზილიელს “ბლაუგრანაში” დაბრუნების სურვილი და მზადყოფნა. კლუბს მხოლოდ ნეიმარის იჯარით აყვანის ან ტრანსფერის მინიმალურ ფასად განხორციელების რეალური ვარიანტი ჰქონდა. ამავდროულად საქმეში მსუყე შეთავაზებით უკვე “ალ ჰილალიც” ჩაერთო, რის შემდეგაც “ბარსელონამ” ნეიმარის ოჯახთან ფეხბურთელის საუდის არაბეთში გადასვლისა და ერთსეზონიანი იჯარის ვარიანტი განიხილა. 31 წლის თავდამსხმელი ამაზე თანახმა იყო, მაგრამ მის კატალონიურ გუნდში გადმოსვლას ხელი ფინანსებმა შეუშალა – “ალ ჰილალის” ინტერესში არ იყო იჯარით გაეშვა ფეხბურთელი, რომელიც 100 მილიონ ევროზე მეტი დაუჯდა.

Sport-ის ცნობით, ნეიმარი მიიჩნევს, რომ “ბარსელონას” დატოვებით შეცდომა დაუშვა და მას დაბრუნების სურვილი ყოველთვის ჰქონდა. რამდენიმე დღის წინ მიღებული მძიმე ტრავმის შემდეგ, ალბათ, მისი და “ბლაუგრანას” გზები აღარასდროს გადაიკვეთება და “ნეიმარის საგაც” გასულ ზაფხულში უკანასკნელად ვიხილეთ.